Tapi sonari sonon nini Jahowa sitompa ho ale Jakob, na manjadihon ho ale Israel: “Ulang ho mabiar ai Ahu do sipaluah ho, domma hudilo goranmu Ahu do simada ho”. (Jesaya 43: 1)
Haganupan hita domma itobus Tuhanta, ai ma sanggah parmateini halani dousanta. Idilo do hita sada-sada nini: “Ulang mabiar, Ahu do simada ho!” Ai ma na masa sanggah pandidion na pansing in, ijai ma masuk hita bani na tanobusni, jolma tobusanni ma hita.
Halani ai ulang be pala sangsi uhurta, tenger ma gelah uhurta bani Naibata, ibotoh do manramotkon ham, seng be sahalak ham mardalan tapi rap ma ham pakon Tuhan in. Age mardalan ham manaborang bah na marbanggal, seng itadingkon ham, porini pe mardalan ham bani gara ni apuy, seng ipaturut ham janah seng panganon ni apuy ai ham. Ra do Ia mangkasomani ham ibagas sitaronon pakon parlajoan age hadoyukon, sai ihatahon banta: “Ahu do Sipaluah ho Ahu do sitobus ho”.
Tongon mahol do ai siat hubagas uhur: Mase ra Naibata mangkasomani ahu pardousa, ahu na tongtong mambahen hagigini pakon pusok ni uhur-Ni? Sai ihatahon: Huhaholongi do ho songon anakku, harga do ho ilobei ni matangku. Ulang mabiar, nini Tuhan in, Ahu do sitobus ho, Ahu do simada ho.
Halani ai pungkahonta ma goluh na baru ilobei ni Tuhanta. Sai toguonni do hita bani dalan sidalananta, gabe manimbil ma sibolis humbanta mabiar bani Tuhanta na rap pakon hita. Seng ipaturut hita, Ia do simada hita, harga do hita Bani, halani holong ni ateini.
Ham Tuhan Naibata, Bapanami na i nagoriatas! Tarima kasih banggal ma Bamu halani banggal ni idop pakon holong ni ateimu bannami. Sai gok Bamu ma hanami. Amen.
Haleluya No. 96 :1, 2. Seng Au Ompungni Ahu >>
1. Seng au ompungni ahu hubere diringkon
bai Tuhan in Rajangku sigomgom tanoh on
Ai bai dirini Jesus au ididah Naibatangku
Na pasonang au
2. Seng au ompungni ahu dob matei Jesus in
Ihopkop do tonduyhu isasap dousangkin
Tongtong ma huondoskon au mangunduk bai Tuhanku
Na lamlam uhur in
Recent Comments