April 28: Arti ni na puho Tuhan Jesus

“Tarsonggot ma sidea anjaha bajoraon, iagan sidea begu na matei”. (Luk. 24: 37)

(Terjemahan baru, 1976, “Gabe tarsonggot ma sidea anjaha mabiar, iagan sidea begu-begu do na niidah ni sidea ai”.
Borat (payah) do bani susian ni Tuhan Jesus mangkaporsayai na dob puho badan ni Tuhan Jesus humbani na matei. Sonai ma sanggah ipatidak Tuhan Jesus dirini bani sidea, tarsonggot janah bajoraon sidea iagan begu na matei ididah. Jadi nini Tuhan Jesus ma bani sidea: “Mase rusak hanima, aha do ipingkiri hanima. Tonggor ma tanganku pakon naheihu Ahu sandiri do on. Tonggor ma, anggo begu-begu seng mardaging, seng marholi-holi songon ni idahnima bangku”. Ase tangkas ipatorang Tuhan Jesus bani sidea, paboa Ia sandiri do, na roh ai, sedo begu-begu. Ai domma puho Ia humbani na matei, angkulani tangkas mardaging, pakon marholi-holi.

Aha do sonari arti ni ai banta, na puho ai badan ni Tuhan Jesus humbani na matei?

Artini ai domma italuhon hamatean, seng sanggup hamatean manjolomi-Si. Bani Tuhan Jesus do bonih ni goluh na sadokah ni dokahni. Marhitei Tuhan Jesus tarbuka dalanta dompak surga. Ambit lalab Tuhan Jesus lang puho humbani na matei tong ma hita ibagas dousa, tartutup ma dalan hu surga, sayop ma dong pangarapan bani goluh magira.

Tapi napuji ma Naibata, ai ipapuho Tuhan Jesus humbani na matei ase tubuh banta pangarapan na manggoluh hu hagoluhan na sadokah ni dokahni.

 

 

Ham Tuhan Jesus! Sai itandai hanima ma Ham na dob puho humbani na matei. Patubuh Ham janah pabanggal Ham ma pangarapannami bani parpuhoon magira ai ampa bani na sadokah ni dokahni ai, ulang galek uhumami i dunia on. Amen.

Haleluya No. 70 : 1- 3. Ale Tonduyhu Napuho Tuhanmu >>

1. Ale tonduyhu na puho Tuhanmu, domma itaban do nagori toruh.
Megah uhurmu martuah ma ho
Rap pakon Jesus manggoluh ma ho,
Rap pakon Jesus manggoluh ma ho
2. Talu sibolis ibahen Tuhanta, ge hamateian, ge dousa ganupan.
Ihamalaskon uhurta ma in.
Pagoluhon-Ni do hita ganup, pagoluhon-Ni do hita ganup.
4. Bujur ma hita mangimbang dousanta,
janah na baen Jesus in hasomanta
Tenger uhurta bai Tuhanta in,
Pamonangon-Ni do hita ganup, pamonangon-Ni do hita ganup.

tnt160428