April 29: “Ahu do Labah in”

 

 

“Ahu do labah in”. (Joh. 10: 9)

Ase gabe Kristen pe hita ibahen dong do pangarapanta laho masuk hita hu surga bois honsi bohalta i dunia on.

Tapi ulang hita lepak dalan. Tuhan Jesus do dalan ai hu surga ibahen Naibata. Marhitei Tuhan Jesus boi ijalo Naibata hita gabe niombah-Ni. Odoran ni Tuhan Jesus ma hita laho hu surga.

Ambah ni ai bani ujung ni dalan ai dong do labah laho hu surga. Labah ai pe Tuhanta Jesus do. Barang, ise na dob sada pakon Tuhan Jesus, ulang pala sangsi be uhurni, surga nari bagianni, rotap honsi hosahni i dunia on. Tuhan Jesus do labah surga. Barang ise na so tiba Tuhan Jesus, seng masuk hu surga.

Marugas ma hita mandalani dalan ai pakon mammasuki labah ai humbani sonari. Roh ma ham bani Tuhan Jesus mamboan dousamu. Ai Tuhan Jesus do Anak ni biribiri ni Naibata na mamorsan dousa ni hajolmaon, dihut mamorsan dousamu. Marhitei Tuhan Jesus ijalo Naibata ham gabe niombahni. Domma igalangkon Tuhan Jesus dirini bahen galar utang dousanta. Matei pe la na so ingkat salahni do. Marhitei parmatei ni ai parhiouan ni Naibata ma ham bani hiou hupintoran.

Anggo domma roh ham bani Naibata marhitei Tuhan Jesus, janah ijalo Naibata ham gabe niombahnii, na martuah ma ham. Tapi ulang lanjar jogor ham i labah ai hape lang masuk. Ulang jongjong i labah ham, masuk ma ham. Roh ma ham bani Tuhan Jesus. Tangihon ham aha hatani bamu. Pindouhon ham ase pangkei ipaahapkon bamu Ia do dalan hu surga janah domma sirsir rupeimu i surga.

Ingatonta ma homa na tarsurat bani Joh. 14 : 6 “Ahu do dalan in pakon hasintongan ampa hagoluhan. Seng dong na das hu bani Bapa in anggo lang marhiteihon Ahu“.

 

Ham Tuhan Jesus! Tarima kasih ma Bamu. Ham do hape dalan hu surga janah Ham do labah hu surga. Suruh Ham ma TonduyMu bangku ase tangkas huhaporsayai ai. Amen.

Haleluya No. 117 :1, 2, 5: Pitah Jesus Hubaen Hasomanku >>

1. Pitah Jesus hubaen hasomanku
Ia do na pasonangkon au
Ningon sai tongtong torang langkahku
anggo rapkon Jesus in au lao
anggo rapkon Jesus in au lao.
2 . Tanoh pakon laut sonang hu bontas,
anggo sai iiring Jesus au.
Hu nagori atas pe sai torus,
do boanon ni Tuhanku au,
do boanon ni Tuhanku au.
5. Anggo roh dilo-Ni bai tonduyhu,
malas uhur mangirik kon in;
Seng tagamon sunsah be uhurhu,
rapkon Tuhankin i surga in,
rapkon Tuhankin i surga in.