27 Juli: Bahen Sinjata Hasintongan

 

“Ulang lopas pagori nasiam bahen sinjata ni dousa, laho mangkorjahon hajahaton, tapi ondoskon ma diri nasiam bani Naibata, songon na dob mulak manggoluh humbani na matei, sonai age pagori nasiam ondoskon ma bani Naibata bahen sinjata ni hasintongan“. (Roma 6 :13)

Domma ijalo Naibata hita ibagas idop ni uhurni marhitei Tuhan Jesus Kristus. Marhak ma hita gabe juak-juak ni Tuhan Jesus. Ia ma tene simada hita, mambalosi-Si janah mangimbang sibolis. Sonari ipio do hita ase haganup pagori ni angkulanta parugas ni hapintoron mambalosi Naibata pakon mangidangi jolma.

Tarpaksa do tanganku mangkorjahon horja, nadingat do ijai hata ni Naibata na mangkatahon: “Na so ra marhorja, ulang ma ia mangan”. Jadi boi do ahu mambalosi Naibata ibagas hasombuhonku. Jadi ija pe ahu marhorja, i juma, i kantor, i parsikolahan atap i pabrik aha pe, ididah Naibata do, marhorja ahu mambalosi hata-Ni do pakon pasangapkon Goranni.

Naheihu pe sihol ma manlangkah dompak hasintongan ulang ma dompak dousa atap parlajoan.

Mata, pinggol, bibir sihol ma pakeon dompak hasintongan. Ulang ma hupakei matangku manonggor-nonggor gambar na mabutak, atap mambasa buku-buku na pabutak uhur, tapi dompak na madear ma, mambasa hata ni Naibata atap surat-surat atap buku-buku na mardomu bani horja hasintongan.

Pingolhu pe ulang be hupakei patangi-tangi barita na jahat atap na dompak hajahaton, tapi patangi-tangi hata ni Naibata ma, ase lambin hubotoh harosuh-Ni na pansing in.

Jagaonku ma age bibirhu ulang iluarhon hata na sambor, tapi hata na madear ma na pasonang uhur ni na mambogeisi pakon manaksibon harajaon ni Naibata.

 

Tarima kasih ma Bamu Naibata! Halani boi ahu mambalosi Ham. Urupi Ham ma ahu ase hupakei pagori ni angkulangku pasangapkon Ham. Amen

Haleluya No. 46: 2,4: Satahun Use ma Surutni >>

2. Porini matei au sonari, huja ma nani tonduyhin?
Bia hasonangan holi nani rap pakon na mapansing in?
Mamuji Naibata do ahu, ibaen holong ni atei Niin
Atap na hona uhum ahu bai apuy na so miloh in
4. Dousangku seng be tarbilangi, hubahen sain dokahni in.
Na dong tarhira be layak ni Tuhanta Jesus na dob in.
Seng ibalaskon Ham, Tuhanku, hu bangku songon dousangkin.
Lumbang do uhur-Mu hu bangku paidah-idah gabeihin.

tnt160727