23 Juli: Mase gati galek haporsayaonta?

 

 

“Ia Ahu ise do Ahu ninnima”? (Mateus 19 : 15)

“Ham ma Kristus Anak ni Naibata na manggoluh in” ai ma balos ni Apostel Petrus bani sungkun-sungkun ni Tuhan Jesus.

Sonaha do bani balosmu porini bamu isungkunkon Tuhanta sungkun-sungkun ai? Boi do ham mambaloskon humbani gok ni haporsayoanmu: “Ham ma Kristus Anak ni Naibata na manggoluh in?

Apostel Petrus domma iahapkon humbani hata ni Tuhan Jesus ampa pambahenanni ronsi pargoluhonni, sonai homas humbani husip ni Tonduy na Pansing hubagas uhurni.

Marhitei dalan ai do boi hita mangahapkon, boi mangakuhon: Ia Jesus na hun Nasaret, Anak ni Naibata na botul do Ia, na dob pinarbagah ni Naibata marhitei nabi-nabini.

Seng boi hita porsaya marhitei tubuh-tubuh ni uhurta sandiri, Tonduy na Pansing ai do marhorja ibagas uhurta patorangkon ai.

Mase gati galek haporsayaonta bani Tuhan Jesus? Halani haporsayaonta ai marbona humbani partimbanganta tumang, lape tangkas husip ni Tonduy na Pansing. Anggo partimbanganta pakon pamingkirionta do, maetektu do Tuhan Jesus ididah hita, janah maotiktu do gogoh-Ni. Tapi dob roh hasaksian ni Tonduy na Pansing ai hu hagas uhurta, gabe torang ma banta habanggalon ni Tuhan Jesus.

Dob sonai age roh sungkun-sungkun banta songon nongkan ai, sangkan ma balosta songon balos ni Apostel Petrus ai.

Ase anggo lape torang bamu habanggalon ni Tuhan Jesus, pindo ham ma Tonduy na Pansing ase iajarhon bamu pasal Tuhan Jesus. Jadi lambin torang ma panandaonta pasal Tuhan Jesus ibagas haporsayaon na sintong. Mardomu hujai do arti ni haporsayaonta na patoluhon ai, na mangkatahon: “Na iparhatongon uhurhu do na so tarbahen ahu porsaya bani Jesus Kristus Tuhanku barang mangayakisi anggo tor uhur-uhurhu sandiri, na ipio Tonduy na Pansing ai do ahu marhitei Ambilan na madear”.

Sintong ni panandaonta bani Tuhan Jesus romban hujai do haporsayaonta dompak-Si, romban hujai do hansa boi isaksihon hita Ia.

 

Ham Tuhan Naibata! Urupi Ham ma ahu marhitei Tonduymu, ase sangkan panandangku bani Tuhan Jesus Tuhanku janah ase sintong hasaksianku pasal-Si. Amen.

Haleluya No. 81:1, 2, 4: Ham Pangapoh na Tarlobih >>

1. Ham Pangapoh na tarlobih, Tonduy ni Tuhan in, uhurhin masuki.
Iparbagah Tuhan nami, ningon Ham do na roh mangajar hanami.
2. Seng adong pambotohnami na dear, na torang humbai dirinami.
Ningon Ham do manondangi uhur ni jolma in, jaha manorangi.
4. Sai patorang Ham bannami marsik ni Jesus in, haluahonnami.
Sai pintor ma uhurnami binaen ni daroh ni Jesus Tuhannami.

tnt0723