“Ai domma tangkas hubotoh sura-sura na husurahon pasal nasiam sura-sura hasonangan do tene, sedo hu hamagoan, ase mamberehon bani nasiam ujung ni na hinasiholan nasiam”. (Jeremia 29: 11)
Gati do mahol mangkaporsayai na ihasomani Naibata hita tongtong, bani panorang parmaraan na sogop hu banta atap pusok ni uhur. Songon na lupa do Naibata ninuhurta banta. Gabe tarlajou do hita use mangkatahon: Na lupa do gakni Naibata mangidah ahu, lang be ibere idop ni uhurni. Balos ni Naibata bamu: “Hubotoh do sura-sura na husurahon bani nasiam, sura-sura hasonangan do, sedo hu hamagoan, ase huberehon do ujung ni na hinasiholan hamagoan nasiam.”
Sonaha, nape sungkup sonai hata ni Naibata banta?
Sedo rosuhta, tapi rosuh ni Naibata do na mardalan. Naibata do marhorja ibagas uhurta patorsahon goluhta. Ibahen do damei, hasonangan hubagas uhurta, ase mamboan pasu-pasu banta.
Ningon idahonta do panogu-noguon ni Naibata banta, itogu do hita dompak hasonangan ampa hagoluhan na sadokah ni dokahni.
Bani panorang na jahat, dilo hita ma goran ni Tuhanta. Iparbagah do balosanni pangindoanta. Anggo ipindahi hita bohi-Ni, sirsir do Ia mambere Idop ni Uhur-Ni hu banta.
Martorap anggo dong pusok ni uhur na mardapot-dapot laho do uhur bani liah, atap sial atap nasip, untungan pangindou hansa.
Lang patut be hita Kristen marpio nasip atap untungan, ai Naibata do na mambotoh atap aha na roh hu banta. Iring-iring Naibata do goluhta.
Ningon dapot hita do pangibulan ni dalan ni Naibata banta. Barang aha pe na masa malas ni uhur atap pusok ni uhur pe tujuan ni Naibata mambahen hita saud do hu hasonangan ampa hu hagoluhan na sadokah ni dokahni. Dong ope sipatorsaon ibagas hauhuronta ase ipaturut Naibata masa sagala na masa in banta.
Tarima kasih ma bani Naibata. Tarima kasih ma bamu Bapa, halani dear do sura-sura-Mu pasal hanami, age aha na masa bannami, ase masuk hanami hu hagoluhan. Amen.
Haleluya No. 126: 1,5: Dear ni in Panogu-Mu Jahowa >>
1. Dear ni in panogu-Mu Jahowa,
bani ganup na pinarmahan-Mu
Seng anjai roh bahenon-Mu na dorsa
Seng tarponopkon Ham be bujur-Mu
Gati suhar do pambahenan-Mu
Bai uhurni na so mananda Ham
Hape halani in marrohan bei
Bai haliharon na tinobus-Mu
5. Jahowa, sai pasabou Ham uhurhu,
mangkamalaskon na binahen-Mu.
Ajari au, patorang Ham langkahku,
lao mangayaki Ham hu surga-Mu.
Sai ulang lopas Ham be kahou au,
pasorap Tonduy-Mu bai uhurhon.
Mangiring-iring au i tanoh on,
ronsi na ondos au hu lambung-Mu.
tnt0908
Recent Comments