“Seng anjai tadingonkon ni Jahowa bangsani, halani goran-Ni na timbul in, dob pala iharosuhkon Jahowa mambahen nasiam gabe bangsani”. (1 Samuel 12: 22)
In ma hata dompak bangsa Israel bani Padan na Basaia, sonai do homa bani Padan na Baru. Ai lang domma hita tardidi? Ibagas pandidion ai iain Naibata do hita gabe niombahni, gabe hasoman sarumah ni Naibata.
Ase ganup hita halak Kristen, domma ibahen Naibata gabe bangsani. Domma masuk hita bani pamili na pansing, parrupei bani siteanon, parrupei tene bani sagala bagah-bagah ni Naibata, parrupei bani idop ni uhumi.
Sonari sungkun hita ma dirinta: Domma hutundalhon sagala hajahaton? Domma hudompakkon Naibata Bapa, Anak pakon Tonduy na Pansing? Sanggah tardidi hita ampa sanggah manaksihon haporsayaon, torang-torang do sungkun-sungkun ai ibalosi hita, pangkei-pangkei. Halani anggo sanggah jut uhurmu halani pusok ni uhur atap asal aha pe, ra do ihatahon ham ibagas uhurmu: Na dob lupa do nani Naibata bangku? Ingat ham ma: Seng tadingonkon ni Jahowa bangsani, ham pe seng tadingonkonni, tapi sedo halani ham, halani Goranni na Pansing ai do halani Goranni na timbul ai do.
Sagala na masa banta ipindo uhur ni Naibata do ase ai hiteini manjuljul hita roh hu Bani. Sai iakuhon Naibata do hita bangsani ronsi das hu ujung. Napuji ma goranni na pansing ai halani holongni na tarlobih ai.
Sedo homa humbani dirinta porsaya pe hita Bani, Naibata do manogu ahu hu Bani, ase boi roh ahu hu Bani halani idop ni uhur-Ni, laho patorsa ahu das hu ujung ni goluhku, hu ujung ni langkahku. Ingat hita ma domma pala iharosuhkon Jahowa mambahen hita gabe bangsani.
Torus do ai patotapon ni Naibata. Itongos Naibata do malas ni uhur pakon pusok ni uhur laho patoras hita ibagas haporsayaon. Mamboan silangta ari-ari. Tapi sada na dob totap ibagas uhurta: Seng anjai tadingonkon ni Naibata hita.
Ham Tuhan Naibata, Bapanami na i nagoriatas! Tarima kasih ma Bamu halani ra do Ham patotap ahu das hu ujung. Urupi Ham ma ahu manulakkon diringku Bamu hibul tulak matah. Amen.
Haleluya No. 130 :1.3: Ai Domma Jumpah Au Ondolan >>
22 Oktober: “Patotaponni do nasiam das hu ujung >>
<< 20 Oktober: Pintor Halani Ipintori
Recent Comments