Ai warga nagori atas do hita, hunjai do ipaima-ima hita Sipaluah hita, in ma Tuhanta Jesus Kristus in. (Pilipi 3: 20)
Bani kuria mula-mula buei do sitaronon ni halak Kristen humbani na so porsaya. Marhitei hata na iatas in sihol patorangon ni Apostel Paulus bani halak Kristen na i Pilippi: Na manginsolat do hita ijon (i tanoh on), i dunia on, sedo hita parjon hinan, parnagoriatas do hita. Sabar ma hita lobei ijon. Roh do holi panorangni alopon ni Sipaluah ai hita, ase iboan hu ianan hasusuranta, ai ma Nagoriatas ai.
Age pe i tanoh on hita sonari, tapi domma idaptarhon hita i Nagoriatas, warganegara surga do hita homa, paima panorangNi mando hita, panorang ni Tuhanta, sadihari roh mangalop hita ganupan. Ijai ma naahapkon torang diri pagori ni harajaon ni Naibata i Nagoriatas, ijai ma hasusuranta, rap ma hita pakon Naibata i surga, dob ialop Tuhanta hita. Ijai maluah ma hita humbani sagala dousa.
Anggo sonai lang malas ma uhurta paimahon hamuliaon ai, ia parah pe paruntolon ijon dompak dousa pakon sagala parlajoan?
Ingatonta ma i Nagoriatas do hasusuranta, hunjai ma Tuhanta roh mangalop hita hun dunia na mangilei on, hubani ianan na so dong be sitaronon, naborit, dousa, pusok ni uhur. Ijai ma hita na loja hun dunia on marsaran. Lanjar rap ma hita pakon Kristus lalab.
Anggo gati idingat hita parnagoriatas do hita, ai ma manirangi uhurta na longkottu i dunia on – na longkottu bani arta na i dunia on. Ai ibotoh hita sedo na piga dokah hape hita ijon. Dihut ma ai mangojur hita mardomu pakon mardamei pakon halak sanggah i pardalanan on ope. Songon na marbarung-barung pe lang hita ijon, songon na mangonjol do hansa tene, anggo nadingat na sadokah ni dokahni ai.
Ham Tuhan Naibata! Tarima kasih ma Bamu halani dihut hanami masuk daptar parnagoriatas. Tarima kasih ma Bamu halani isuan TonduyMu age bannami pangarapan bani parpuhoon magira ai. Amen.
Haleluya. No. 185: 1, 5, 7: I Surga Hasonangan In >>
1. I surga hasonangan in ianan sidearan in
Hujin sol laho misir au, ase rap pakon Jesus au.
5. Na dong hasohan tanoh on, ai surga in do na tongtong;
Ai tanoh partangisan on, i surga sonang tonduyhin.
7. Dear do rupeimin ijin, i lambungni Tuhanta in.
Hinsah ma tong baen langkahmin, ‘se sonang bai nagorimin.
29 Nopember: Roh Ia ase Ia raja ni uhurta >>
Recent Comments