Halani ai, anggo iboan ho galanganmu hu anjap-anjap, anjaha taringat uhurmu bani sogam ni uhur ni saninamu bam, tadingkon ma galanganmai ilobei ni anjap-anjap ai, laho ma ho lobei mardear ampa saninamai, dob ai pe ase roh ho mangondoskon galanganmai! (Mateus 5 : 23-24)
Galangan do sonai nagoran tonggonta dompak Naibata. Anggo dong sogam ni uhurta atap domdomta dompak hasoman, tontu hita pe lang sonang martonggo hubani Naibata. Napasalosei ma ai lobei. Anggo ai naarusi do. Hinatahon ni Hata na iatas on, sedo uhurta dompak hasoman, uhurni hasoman do dompak hita, sonto ma lobei manggalang (martonggo), mardear ma lobei. On ma na mahol dalanonkon anggo lang ra hita marditoruh, anggo gijang uhurta.
Pareksaonta do, atap halani sogam ni uhur ni hasoman dompak hita do ase lang tolpus tonggonta hubani Naibata anjaha lang ibalosi Naibata. Ase sedo hape pitah uhurta jagaon ulang marsogam ni uhur dompak hasoman, dihut do uhur ni hasoman ulang marsogam ni uhur banta.
Anggo martonggo hita dompak Naibata, sura-suranta ijai ase dear uhurta dompak Naibata, dear uhur ni Naibata homa dompak hita, mardamei hita pakon Naibata. Mardomu hujai ipindo Naibata do mardamei hita pakon hasomanta, sonai homa hita dompak hasomanta.
Ai ma ase anggo manggalang ham, dong idingat uhurmu sogam ni uhur ni halak dompak ham, pasoh lobei na manggalang ai, padear lobei uhur ni hasoman ai dompak ham, dob ai pe ase itoruskon na manggalang ai. Jadi ibagas tonduy na damei ma ham roh hulobei ni Naibata, jadi malas ma uhurni manjalo galanganmu.
Hunjai taridah maningon dihut do tonggoonkon na marsogam ni uhur banta, ase lamlam uhurni mangidah hita. Porluonkonta do patorsahon, padearhon sogam ni uhur ni halak dompak hita, ai manundati galanganta do ai hape.
Ham Tuhan Jesus Kristus: Suruh Ham ma hu bangku TonduyMu, ase hutanda hahuranganku. Urupi Ham ma ahu ase mardamei ahu pakon hasomanku, sonai homa hasomanku dompak ahu. Amen.
Haleluya No. 19: 1, 2: Damei do Nimu Bereon >>
1. Damei do nimu bereon, Jesus bani bangsa-Mu,
Tonduy-Mu do pasaudkon, hata bai jabolon-Mu,
Na doyuk janah masombuh, au seng patut rongkon Ham
Tonduy Na Pansing ma suruh ‘se gogoh manombah Ham.
2. Ale Tonduy Sipardamei sai masuki hanai on.
Sai pasada uhurnami, ‘se marbuah ganup on.
Sai tangima pinggol nami lao manangar ojur-Mu;
Ase tambah ringgas nami pararatkon hata-Mu.
Recent Comments