Martuah ma sagala na matei. Ai ma na matei ibagas Tuhan. (Pangungabon 14 : 13)
Seng porlu anjaha seng patut mabiar halak Kristen bani hamatean. Ai ibotoh domma ipasirsir Tuhanni bani ianan hasonangan i nagoriatas, bani ianan hamuliaon. Songon Apostel Paulus dearan do uhurni rap namin pakon Kristus daripada soh marianan bani angkulani.
Marbursik-bursik do halak sapari bani hamatean, marpalis-palis. Ibagas haporsayaonta ibogei hita boi do martuah na matei. Ai ma hasurungan ni halak Kristen na porsaya. Lang mabiar be mangidah hamatean songon parbiarni sanggah nape porsaya ondi.
Ase humbani sonari seng porlu be hita mabiar mangidah hamatean, ai domma ipasirsir Tuhanta banta ianan hasonangan i nagoriatas, ijai ma hita rap pakon Tuhanta use. Salpu ma sagala sitaronon pakon pusok ni uhur. Naborit seng dong be. Hamatean age iluh pe seng dong be ijai. Rap manggoluh ma hita pakon Kristus sadokah ni dokahni.
Tapi ra do lang manarik bamu hatorangan ai. Buei do i tanoh on na so saud boi mangkaporsayai hinaporsayaonta in. Tapi age pe sonai, ulang mabiar, ai do roh hamatean ai roh ma Kristus manogu ham hu hasonangan ai. Pindoonta do ase sirsir hita idilo honsi hu hasonangan ai.
Paima roh hamatean ai marlajar ma hita bani podah na baru on paboa Kristen hita. Sapari bursik ma na matei, sonari martuah ma na matei. Anggo domma hita porsaya botohonta ma, hamatean ai do labah lahu hu surga, hu rumah ni Bapanta.
Halani ai seng patut be mabiar hita mangidah hamatean. Tapi laho ma uhurta bani hata ai: “Martuah na matei ibagas Tuhan!” Artini hubani Tuhan do uhurni pakon goluhni ipadalan. Manggoluh bani par-Tuhanon do ia. Ia matei pe halak na sonai ai ibagas Tuhan ma.
Ham Tuhan Jesus! Patidak Ham ma hubagas uhurnami goluh na bani ilambungmu, sijaloon ni sagala na porsaya Bamu. Pamasuk Ham ma hanami hujai. Amen.
Haleluya No 185: 1,2, 5, 7: I Surga Hasonangan In
1.I surga hasonangan in ianan sidearan in
Hujin sol laho misir au, ase rap pakon Jesus au.
2.Tongon buei ope na dong manrahut au i tanoh on,
Sai rotapkonku ma in tong, marayak surga do au on.
5.Na dong hasohan tanoh on, ai surga in do na tongtong;
Ai tanoh partangisan on, i surga sonang tonduyhin.
7.Dear do rupeimin ijin, i lambungni Tuhanta in.
Hinsah ma tong baen langkahmin, ‘se sonang bai nagorimin.
3 Nopember: >>
<< 1 Nopember: Domma ipakei hita pakean pesta ai?
Recent Comments