Mei 25: “Sai dapotan do na mangido”

 

“Sai dapotan do na mangido“. (Mateus 7 : 8)

 

Naibata, ai ma Bapanta na i nagoriatas, anak-Ni do hita sagala na porsaya bani Tuhan Jesus. Jadi songon anak do hita dear roh bani Naibata siap dong haru ni uhurta atap jut ni uhurta janah mangindo partolongan: Ra do Naibata mambalosi tonggonta janah mambere na porlu banta.

Tapi porlu homa ibotoh hita, sabotulni seng ibotoh hita aha na porlu banta, botohan do Naibata pasal ai. Botohan do bapa aha na porlu bani anakni na etek-etek in. Seng sai ibere ganup pinindoni. Martorap ipindo do pisou na marot bahen guro-guroni, tapi boi do ai mangugahsi, tontu seng ibere ai paima ibotoh ruhut ni na manjolom pisou. Halani ai bani ujung ni tonggonta, dear ma ihatahon hita: “Ham Bapa, botohan do Ham pasal na porlu bangku age legan ni na hupindo ai bere Ham bangku”.

Tangionkon ni Naibata do pangindoan sisonai ai, janah bereonni romban hubani na porlu banta na manuju bani goluh na sadokah – dokahni ai. Na dob pinaridanan ma on: Anggo na porlu bani partonduyonta ipindo hita sai ibere Naibata do. Anggo na porlu bani angkula on do hansa, lape tontu atap ibere Naibata.

Umpamani, anggo ipindo hita uhur ase ibotoh hita mandalankon harosuhni, ase ibotoh hita mamberehon goluhta bani harajaonni, sai ipatuduh do dalan, itangihon do tonggonta, ibalosi do pangindoanta. Anggo ipindo ham porini, “bahen Ham ma ase gabe pasu-pasu parsaoranku arian on”, sai bereon ni Naibata do. Atap “bahen Ham ma ase husaksihon goranmu arian on bani hasoman na pajumpah pakon aha”, bereon ni Naibata do. Atap “urupi Ham ma ahu ase marsangap goranmu hubahen arian on”.

Pangindoan-pangindoan sisonon ma na ibalosi Naibata. Bani sisonai ma bagah-bagah dapotan do na mangindo.

 

Ham Bapanami na i nagoriatas! Tarima kasih ma Bamu halani boi hanami mansahapkon isi ni uhurnami hu Bamu. Tarima kasih ma Bamu halani gati do itangihon Ham tonggonami. Sai ibotoh hanami ma mangindo hu Bamu, anjaha tenger uhurnami, sai dapot do pinindonami. Amen.

Haleluya No. 153 : 2,3: Ondoskon Haganupan >>

2.Ningon tenger uhurmu mardingat Tuhan in.

ijin ma jaloonmu na pinarsintamin.

Ai lang adong gunani, age marhoru ho:

Tonggomu do dalanni ase jumpahan ho,

3. Ibotoh Naibatanta na porlu banta bei,

na dear roh hu banta rnarnbahen sirsir bei

na dear ipatud u tongtong hubanta on.

Na dorsa ipadaoh manjaga hita on .

Catatan Admin: ayat “Sai dapotan do na mangido”(Mateus 7 : 8) bani terjemahan baru, “Ai sai na manjalo do na mangindo”,..

tnt160525