Mei 23: Tonggo Sipakulah-kulah

 

“Anggo martonggo hanima ulang songon sipaluah-kulah”. (Mateus 6 : 5)

 

Anggo martonggo sipahulah-kulah, tarhatahon sedo Naibata iparsahapkon sanggah na martonggo ai ia, tapi jolma do. Halak na sonai do na marosuh jongjong i sirpang martonggo atap i parguruan (sinagoge), ai ijai buei hasoman mangidah pakon mambogei tonggoni, ase hubani jolma ai do igalangkon tonggoni, sedo hubani Naibata. Jadi ihormat halak ma ia, tapi Naibata seng ipasangap, ai ididah Naibata do uhur ni jolma. Seng ijalo Naibata tonggoni halani panggulmiton ni angkulani pakon hatani.

Hupabodak do sahali matangku sanggah martonggo ipartonggoan i gareja, ilambungku tudu sipartonggo ai, ingat nanget tumang hatani ingat gogoh homa. Na sonaha ma ai nani ninuhurhu, gabe hukawahkon nanget hape na margoling-goling do dompakni, dompak na hundul i partonggoan ai, ase ibogei gakni hatani. Ase hata dompak jolma do, seda hata dompak Naibata, sipahulah-kulah do.

Anggo martonggo ham ulang ma sipahulah-kulah, ulang ma mardousa ham ibagas na martonggo ai use. Anggo martonggo ham Naibata do parsahaponkonmu, songon anak na marsahapkon bapani. Anggo martonggo ham ibagas humpulan sahapkon ham bani Naibata aha gakni na porlu bani na humpul ai. Ningon iahap ham ilobei ni Naibata do ham na marsahap ai. Na porlu bani na suni do ham martonggo, sonai do podah ni Tuhan Jesus, sahapkon ham ma bani Tuhanta aha haru ni uhurmu.

Sada na porlu pindo ham ma gogoh humbani Naibata laho mangkorjahon harosuh-Ni ampa habotohon pasangapkon-Si. Porlu tumang lambin gati ham pajumpah padua-dua pakon Tuhanta Naibata, anggo sonai lambin ibotoh ham do martonggo ilobei ni hasoman. Na mardomu, pajumpah (kontak) do hita pakon Naibata siap martonggo. Ai ma parohkon pasu-pasu banta, mandalani goluh on.

 

Ham Tuhan Naibata, Bapanami na i nagoriatas! Suruh Ham ma Tonduymu hubagas uhurhu, ase hubotoh martonggo, songon anak hubani Bapa. Amen.

Haleluya No. 112 : 3,4: Sai Bujur ma Ho Mangimbang >>

3. Imbang, ase tong maringgas pabulatkon uhurmin.
Bai Tuhanta Jesus Kristus; Sai tundalhon dousa in.
4. Sai gomosi partonggoan bai Tuhanta Jesus in.
Ulang ho marparsaranan borngin ‘ge arian in.