Mei 18: “Gabe sidalankon Hata ai ma nasiam”

 

Gabe sidalankon Hata ai ma nasiam, ulang sipanangi-nangi hansa, na paoto-otohon dirini. (Jakobus 1 : 22)

 

Ia hata ni Naibata na margogoh do paluahkon, halani ai basa hita ma Hata ni Naibata, janah tangar hita. Pindo hita ma Tonduy na Pansing ase ibere banta gogoh manjalo hata ni Naibata ampa uhur na hormat dompak Hata ai. Anggo ihatahon Hata ni Naibata banta atap aha sidalanonkonta, dalankon hita ma, ai ma na mangkormat pakon na patunggungkon Hata ni Naibata.

Buei do na mambogei Hata ni Naibata janah iahap ituduh dousani, tapi seng roh ia mansopotkon dousani ai bani Naibata, seng ipindo hasasapanni. Sisonai na manangi-nangi do hansa ia, sedo na mandalankon.

Tapi sisonai ai seng dapotan pasu-pasu ia humbani Hata ai, ai seng dong pangkorhon ni Hata ai bani. Porlu tumang do Tonduy na Pansing banta mambere hatorangan pasal isi ni Hata ni Naibata, ase Ia homa mambere gogoh banta mandalankon Hata ai ampa mambere malas ni uhur mangkorjahonsi.

Anggo ituduh Hata ni Naibata hurangta, dousanta, na tongon do ai. Ra ma hita mansopotkon ai pakon marjora-jora mangkorjahon sonai use. Napindo ma gogoh pasal ai, ibere Naibata do.

Anggo ibogei ham bagah-bagah ni Naibata mangkatahon isasap Naibata dousamu, mintor jalo ham ma ai ibagas tenger ni uhur pakon ibagas tarima kasih. Pujion ma Naibata pasal ai.

Ia martonggo ma hita laho mamungkah marminggu, pindoonta ma hubani Naibata ase siat Hatani ai banta janah marhorja manopa uhurta. Pindoonta ma ase malas uhurta mambogei pakon manjalo hata ni Naibata janah marhorja ma Hata ai patureihon dirinta. Gabe sidalankon hata ai ma hita.

 

Ham Tuhan Naibata hupuji ma Ham halani ibere Ham hata-Mu na maharga ai bannami. Sai pargogohi Ham ma hanami mandalankon hata-Mu ai. Amen.

Haleluya No. 18 :1,2: Hata-Mu ale Tuhanku >>

1. Hata-Mu ale Tuhanku, arta siharganan ai
Sai palongkot bai uhurhu, ulang lang hujolom ai
Anggo seng be sijoloman Hata na madear ai
aha ma na baen onjolanni haporsayaonkin
2. Ale Jesus sai kawahkon, sai parorot Ham au on
‘Se totap haporsayaon mangiankon uhurhon
Sai paringgas Ham uhurhu, manangihon Hata ai
Sai horahan bai podah-Mu, songon si Maria ai

tnt160518