9 Maret: Manjalo Gogoh Laho Mangimbang Sagala Parlajoan

Si Adam nalobei ni pardagingonta, ilajou sibolis, gabe lupa ia bani hata ni Naibata, dobni talu. Tuhan Jesus Kristus nalobei ni partonduyonta pe ilajou sibolis do, tapi tongtong do idingat hata ni Naibata, gabe talu sipanlajou ai ibahen. Halani ai sanggup do Tuhan Jesus mangurupi hita anggo roh parlajoan hu banta.

Sonari na porlu sungkunon banta: Ise do nalobeimu, si Adam parlobei do atap si Adam paduahon (Jesus Kristus)? Jolma pardagingon do ham atap jolma partonduyon. Anggo rosuhan do ham marguro-guro ampa dousa, jolma sapari ope ham, ginompar ni si Adam hansa.

Tapi ulang ham lupa halak Kristen do ham, artini pengikut ni Kristus. Domma sonai goranmu dob tardidi ham. Jadi anggo ra do ham manjalo gogoh humbani Tuhan Jesus, ibere do gogoh bamu laho mangimbang sagala parlajoan ma binahen ni sibolis, gabe boi ham monang songonsi na dob monang ai.

Sadihari pe sirsir do Tuhanta mangurupi ham, asa ra ham mangindo partolongan Bani. Anggo idingat hita gelah hamonanganni bani parlajoan mangimbang sibolis, roh ma gogohta.

Tapi ulang lupa hita, Tuhan Jesus sandiri pe hata ni Naibata do tong balosni laho mantaluhon sibolis ai. Ai do ase porlu iparimbagaskon hita hata ni Naibata, ase dong sinjatanta bani masa ni parlajoan.

Tarima kasih ma bani Naibata, halani sedo pitah ginompar ni si Adam parlobei hita, tapi dihut do ginompar ni si Adam na paduahon (Jesus Kristus). Sedo ginompar ni partalu-talu hita, tapi ginompar ni parmonang do.

Ham Tuhan Jesus na monang torus bani sagala parlajoan, sai dohor ma Ham ilambungku sanggah roh parlajoan hu bangku ase dihut ahu monang songon Ham na monang in. Amen.

Haleluya No. 121 :1, 5. Jesus Goluh ni Tonduyhu >>
1. Jesus goluhni Tonduyhu, ham do haporusankin.
Anggo tumpu bai tonduyhu bolis pakon setan in.
5. Lang adong be hagoluhan, anggo seng na hun Bamu.
Ganup jolma, ale Tuhan, sai manombah hu bamu.