30 Maret: “Ija Ma Sungkup in”?

tnt_170330_marhorja

 

Dong do ijon sahalak na mamboan lima ruti pakon dua ihan, tapi sadiha ma in bani na sain buei”? (Johannes 6 :9)

Terjemahan baru (1973, LAI) Adong do ijon sada dakdanak, na mamboan lima ruti pakon dua dengke, tapi sadiha ma in bani na sain buei?

Buei do namatoras na songon pangkawahon ni si Andreas bani barita on. Na mangkawahkon buei ni dakdanakni na lambin banggal janah lambin magodang, lambin buei haporluanni. Mangkawah homa ia bani pansarianni seng lambin banggal. Ija ma sungkup in bani na sain buei? Songon na gobir uhurni. Sunsah ma on ninuhurni.

Bani orangtua na sonai ai porlu ma ibotoh barita ni Tuhan Jesus pasal ruti na lima ai pakon ihan na dua ai na pinasu-pasuni. Bosur 5000 halak janah dong ope lobih-lobihni.

Nasiam orangtua, ulang ma laho uhurta bani boratni ai, bani hurangni ai. Tapi laho ma uhurta dompak Tuhan Jesus. Seng daoh Ia humbanta, itongah-tongahta do Ia, holong do uhur-Ni mangidah hita, ra do Ia mangurupi hita songon sanggah itanoh on ijia.

Hita orangtua, mangkawah dompak Tuhan Jesus ma hita, dompak Bapanta ma i nagoriatas, na ra mambere bani dakdanakni. Patugah Ham ma hu Bani haboratanmu janah pindo ham ase ipasu-pasu horja ni tanganmu. Ajari ham homa dakdanakmu martonggo boi rapkon ham. Ase ipasu-pasu Naibata goluh nasiam ari-ari. Ai Naibata na mambere niombahni in banta, Ia do homa mansarihon goluhni ari-ari.

Tapi ulang hita lupa manranggi horjanta pakon mangkorjahon panorang na binere ni Naibata banta laho mangkorjahon ranggian ai. Ibotoh hita do: Na so ra marhorja ulang ma ia mangan. Biak ni halak na porsaya seng ra ia marlansei bani horjani.

 

Ham Tuhan Jesus! Patenger Ham janah patotap Ham ma uhurnami bani pasu-pasu-Mu ibagas horjanami. Ajari Ham hanami manranggi horjanami pakon mamakei panorang na bineremu bannami mangkorjahon horja ai. Amen.

Haleluya No. 190: 2, Marhorja Pe Hapeni

1. Marhorja pe hapeni ganup partidah in

Hape anggo jadini bai Naibata do in

Ibahen milas ari marudan namur pe

Tongtong pasu-pasu-Ni marguru Bai hape

Ganup halayakon ibere Naibata

In pe tenger uhurmu da bai Tuhan Naibata!