4 Maret: Onjolan ni Pangarapanta Pasal Goluh Magira

Ra domma das bamu ojur-ojur na mangkatahon ase roh ham bani Tuhan Jesus, Ia do Anak ni ni Naibata na mamorsan dousa ni dunia on, pakon na mamorsan dousamu homa.

Ongga ma das bani pangahapmu, tongon Tuhan Jesus na mamorsan dousamu, na paluah ham, ongga ma iluarhon ham ai humbani putih ni uhurmu? Ihatahon ham: “Tuhan Jesus do na paluah ahu, Ia do na mamorsan dousangku marhitei darohni na madurus i dolog Golgata, ai ma bahen hasasapan ni dousangku pakon sagala panlanggaronku”. Anggo sonai tontu ganup panorang do ham mangkawah Bani lambin holong ma uhurmu Bani, janah ipuji ham ma Naibata halani idop ni uhur ai.

Tapi anggo lape torang iahap ham Jesus ai Sipaluah ham, ampa Sipaluah dunia on, mahol do ham mangkalupahon dousa ai, mulak mulak hujai do uhurta. Naibata idingat do ai ganup das hu paruhuman magira. Tapi anggo iahap ham domma ibuat Anak ni ni Naibata dousamu pakon dousa ni dunia on, dear ma ai.

Halani ai mangkawah ma ham dompak Jesus, ai domma iporsan dousamu. Lang patut ma holong uhurmu bani na dob mamorsan dousamu, na dob manasap dousamu? Ai ma onjolan ni pangarapanta pasal goluh magira ai, domma pintor hita binahen ni hapintoron ni Tuhan Jesus.

Halani ai pindoonta ma Tonduy na Pausing ase ipatotap haporsayaonta pakon pangarapanta, ase tangkas iajari hita paboa domma iporsan Anak ni biribiri ni Naibata dousanta rap pakon dousa ni dunia on.

Ham Tonduy na Pausing! Pasanggup Ham ma ahu mangarusi pakon mangahap, na dob iporsan Anak ni biribiri ni Naibata dousangku rap pakon dousa ni dunia on, sanggah bani parmateini bani hayu parsilang. Amen.

Haleluya No. 64:1, 2. Laho do Biri-biri in >>

1. Laho do Biri-biri in mamorsan ganup dousa,
ni haganupan jolma in ase maluah hita.
Iporsan naboritta in, ibere do diri-Ni in,
Hu tangan ni pamunuh,
itaron do na sahit in, das bai na rotap hosah-Niin
nini “Sai porsanon-Ku”
2. Ai anggo Biri-biri in, in ma huan-huanku,
Na paluahkon tonduyhin, isuruh Naibataku.
Ai nini dompak Anak-Nin: ”Parayak ma pardousa in
Na dob pinapaanku, banggal do ringiskin,
Tapi tarbaen mahombun in pangkorhon ni daroh-Mu”