28 Maret: Banggalan ope idop ni uhur-Ni ase dosangku

 

“mangkarosuhkon idop ni uhur do Ia”. (Mika 7: 18b)

Terjemahan baru (1973, LAI), “ai marharosuh do Ia bani idop ni uhur”

Pasal Naibata ibotoh hita do: Seng tongtong Ia manggila, mangkarosuhkon idop ni uhur do Ia. Marhusor do Ia dompak hita, maidop do uhurni mangidah hita, ipadaoh do panlanggaronta, irungkub do dousanta.

Porsaya do Ham sonai uhur ni Naibata dompak hita? Tongon mahol do hita mangkaporsayai ai halani seng sonai paruhuronta. Anggo mardousa ham roh ma sibolis mangkusipkon bamu: Uhumon ni Naibata ma ho, seng mulak be uhur-Ni mangidah ho.

Tapi ulang ham lupa paridop ni uhur do Naibata, na mangkarosuhkon idop ni uhur do Ia. Roh ma ham gelah hu Bani. Boan ham sagala haboratanmu. Atok ma uhurmu mangkatahon ibagas haporsayaon: Maidop do uhur ni Naibata bangku, ra do Ia manasap dousangku. Ai banggal pe dousangku, banggalan ope idop ni uhur-Ni, iogapkon do dousangku hubagas laut idop ni uhur-Ni.

“Pintor bilang ompung naibata!” nini nalobeita sapari anggo dong na mandorunsi janah seng tarimbangsi. Pambotoh ni nalobeita pasal naibata: “Na pintor do ia”.

Anggo singgan sonai do pambotohta seng pe hita mandohori Naibata na pansing janah na pintor in, ai hona uhum nari mando hita halani dousanta. Tapi porlu ma ibotoh hita holong ni uhur ni Naibata banta na marhitei Tuhan Jesus Kristus. Anggo sonai pe ma hita roh hu Bani marhitei Tuhan Jesus Kristus. Ia do badan ni holong ni Naibata banta. “Ai sonon do parholong ni atei ni Naibata bani dunia on, pala do Anakni sisada-sada in iberehon ase ulang magou sagala na porsaya Bani, tapi ase dapotan hagoluhan na sadokah ni dokahni” (Joh. 3 :16).

 

Ham Tuhan Naibata, Bapanami na i nagoriatas! Sai iahap uhurnami ma idop ni uhur-Mu pakon holong ni atei-Mu na banggal in bannami ronsi sadari on. Maidop ma Ham mangidah hanami, sasap Ham ma dousanami. Amen.

Haleluya No. 134: 1, 2: 134. Ambit Lang Ham Rupeihu, ale Jesus 

1. Ambit lang Ham rupeihu ale Jesus,
jaha daroh-Mu manghakui ahu
mintor huja ma ahu na mardousa, marhaporusan.
2. Ai seng be dong na songon Ham Tuhanku,
na parlunggarhon pusok ni uhurhu;
Sahalak Ham do sipasonang ahu, hagoluhanku.