9 Juli: Seng Ipadingat-dingat be Dousanta

 

“Ahu tongon, Ahu sandiri manaloseihon sagala panlanggaronmu, lang be Hupadingat-dingat sagala dousamu”. (Jesaya 43:25)

Sonai ma hata ni Naibata dompak uhurta na bulinsah janah na jogal. Sihol patidakon-Ni banta na tong do hita irahut idop ni uhur-Ni. Ipatorang banta na sirsir do Ia manasap sagala dousanta, sedo halani hita, tapi halani Naibata sandiri do, halani idop ni uhur-Ni sandiri.

Dong do tongon panorang, tangkas do iahap uhurta janah ihaporsayai uhurta na dob iain Naibata do hita gabe anak-Ni halani idop ni uhur-Ni tumang. Tapi dob roh dousa habadoron ai banta manlanggar ma hita bani titah ni Naibata na pansing ai, songon na magou ma haporsayaonta. Dobni gabe lang be mardarmei uhurta pakon pingkiranta. Porlu do banta idop ni uhur ni Naibata namin, tapi songon na mabiar ma hita, ninta ibagas uhurta: “Lang be maidop uhur Ni Naibata bangku, lang be ijalo Naibata na songon ahu on.”

Seng sonai pingkiran ni Naibata, sedo na songon manisia anggo Naibata. Jaloon ni Naibata do hita ase sirang hita humbani dousanta. Maporus bani Naibata ma ham mardingat sagala bagah-bagah-Ni. Ia do mangkatahon: “Ahu tongon, Ahu sandiri manaloseihon sagala panlanggaronmu.”

Halani marosuh Naibata sonai, halani holong ni uhur-Ni bamu, halani maidop uhur-Ni mangidah ham. Sedo dousanta ididah Naibata, hita do. Banggal pe dousanta banggalan do idop ni uhur Ni Naibata, na manasap ai. Tapi ipindo Naibata do ase martoruh ni uhur hita mansopotkon sagala dousanta, ronsi mangindo hasasapan ni dousa iluarhon ma bani tonduyta: “Lang be Hupadingat-dingat sagala dousamu.

Anggo ijalo hita ai humbani bulat ni uhurta, mardamei ma hita pakon Naibata, sonang ma uhurta mandalani goluh on.

 

Ham Bapanami na i nagoriatas! Maidop ma uhur-Mu mangidah ahu, ulang torih Ham hanami ilopah ni dousanami, tapi torih Ham ma hanami ilopah ni holong ni atei-Mu na ibagas Jesus Kristus Tuhan nami, na dob matei marsik mangkopkop hanami. Amen.

Haleluya No. 193: 1,3,5: Ise do Anggiku

1. Ise do angging-Ku atap botouhin
Nini Tuhan Jesus bai dakdanak in.
3. Sai ringgas ma hita mandalankon in.
ase dapot hita pasu-pasu in.
5. Sai padaoh dousa humbannami on,
ase sai dohor ma Ham bannami on.

tnt0709