“Girah sogod golap-golap ope, puho ma Ia (Jesus) anjaha misir hu darat, laho ma ia bani ianan na suni martonggo.” (Markus 1:35)
Bani panorang ijia buei do na boritaan iparmalum Tuhan Jesus. Songon na iubung do gogohni ari-ari laho mangkaholongi jolma na marbagei-bagei in na mangarou masam-masam ni naborit, jinuljul ni holong ni atei-Ni. Haholongon do haganup pambahenan-Ni.
Bani ayat na iatas on tarungkab do otik rusia ni hagogohon ni Tuhan Jesus: “Girah sogod golap-golap ope puho ma ia anjaha misir hu darat, laho ma Ia bani ianan na suni martonggo”. Paima ipakei Tuhan Jesus sada ari, iporluhon do girah pajumpah pakon Naibata, lobei marsahapi padua-dua pakon Naibata paima ipungkah horja-Ni, paima ipakei sada ari. Lobei ijalo pasu-pasu pakon gogoh humbani Naibata pakeonni sadarini ai, bani ari na baru ai.
Ihatahon Tuhan Jesus do ase iihutkon hita Ia, ase iusihi hita Ia.
Sonaha, lang malas do uhurmu martonggo siap sogod? Ai hita pe sai marsaor do pakon jolma na marsiboan rumang ni partonduyonni. Na mabutak do na deba, pakon sisonai ma hita marsaor ase bobaonta sidea bani na susi in.
Porluan ope hita marsaor pakon Naibata lobei gendo ulang dihut hita taruyun bani paruhur dunia on. Ambah ni ai porlu homa marpasu-pasu sagala horjanta anjaha margogoh tonduyta.
Anggo sihol idanganta Naibata, anggo sihol balosanta, sihol pasangaponta Ia, porlu ma tong pindoonta pasu-pasu na baru pakon gogoh na baru.
Anggo lansei hita mandalankon ai, ra ma horjanta ampa pasaoranta pasangap dirinta hansa, lang be pasangap Naibata.
Ningon mambahen hasangapon ni Naibata do tujuan ni goluhta ari-ari, atap aha pe ihorjahon hita. Porlu iahap hita tong dohor do Naibata ilambungta.
Ham Tuhan Nabata Bapanami! Pasupasu Ham ma hanamni ase boi mandalankon hasangapon-Mu ari-ari. Amen.
Haleluya No. 108: 2, 6. Sanggah Holong Tong Tuhanta >>
2. Sai tundali na madorsa, sai dompakkon Naibata,
Tanda na tongon porsaya ho bai Tuhan Naibata.
6. Sai martonggo ulang holang, ase tambah gogohmin,
Janah sai tongtong ho sirang humbai ganup munsuhmin.
Recent Comments