15 Pebruari: Manangihon Dilo-dilo ni Tuhan Roh hu Bani

tnt_feb15_joh 12_32

 

Anggo Ahu dob ipagijang Ahu hun dunia on, arahonkonku ma halak haganupan hu Bangku. (Johannes 12: 32)

Terjemahan baru (1976), “Anggo Ahu, dob ipagijang Ahu hun dunia on, tarikonku do haganup sidea Bangku”

Sihol arahonkon ni Tuhan Jesus do haganup halak hu Bani. Seng marosuh Ia otik hansa ibagas harajaon-Ni. Malas uhurni anggo haganup hita manjalosi. Sedo pitah jolma na madear atap na patut-patut hansa. Age pardousa banggal pe iarahkon do. Sonai pe uhurni ase maluah do jolma in. Isuruh ope Tonduyni paahapkon hu banta na dob iain Naibata hita gabe niombahni.

Domma ongga iahap ham ojur-ojur ni Tonduy ai bamu, dob ibogei ham holong ni uhur ni Tuhan Jesus bamu, sonai do homa Tonduy ai. Isuan do haporsayaon pakon pangarapon bamu, hubani uhurmu.

Anggo ipingkiri hita dousanta, nabotoh homa na dob matei do Tuhan Jesus manggalar utang dousanta, gabe masihol ma tonduyta mangayaki Tuhanta, hataononta ma: “Maidop ma uhurMu Tuhan Jesus, paahapkon Ham ma hu bangku holong ni ateimu na banggal in”.

Anggo matei Tuhan Jesus mangkopkop pardousa, iahap ham homa banggal ni dousamu, tontu iojur ai ma uhurmu roh bani Tuhan Jesus.

Sonaha, nape itangar ham sora ni Sipaluah ai? Parholong ni uhur banggal, na matei mangkopkop pardousa?

Marbagei-bagei do pingkiran roh hubagas uhurmu. Tontu gati sihol dompak na madear sura-suramu, ai ma sora ni Tuhan Jesus na mandilo ham: “Roh ma nasiam hu bangku ase hupasonang nasiam”.

Ai lang gati do iahap ham songon na ganggang ham humbani Tuhanta? Sai ulang ma sirang hita humbani holong-Ni. Sirsir do Ia tong sihol manjalo hita mulak. Anggo sonai tarolos ma hita laho hu abingan-Ni.

 

Ham Tuhan Jesus! Seng ipaksa Ham hanami roh hu Bamu, tapi ipio Ham do hanami ari-ari. Urupi Ham ma hanami ase ibogei hanami pardilo-Mu. Amen.

Haleluya No. 111: 1,3. Sai Mulak, Sai Mulak >>
1. Sai mulak, sai mulak na mardagang do ho!
Ai daoh ho nuan, sirang do tuah min.
O pardagang ou! Mulak! Mulak ma ho!
Mulak! Mulak ma ho!
3. Sai mulak, sai mulak, ho hun siou nadaoh!
Hadoyuokon do in, dageionmu ijin.
O pardagang ou! Mulak! Mulak ma ho!
Mulak! Mulak ma ho!