Hanima pe, jaga ma, ai na roh do Anak ni Jolma in bani panorang, na so panagamannima. (lukas 12 : 40)
Anak ni Manisia in roh do use manguhumi na manggoluh pakon na dob matei, tapi atap andigan ia roh seng ibotoh hita, Naibata do mambotohsi. Ra do barah Ia roh, ra do homa hundokah ase roh.
Tapi bani ayat na iatas in torang: Roh do Ia bani panorang na so niagak. Halani ai maningon tagam hita janah sirsir mangalo-alo siap jam, siap arian atap siap bomgin pe. Martuah ma juak-juak na jaga dapotsi roh honsi Ia.
Tapi buei do na lambin loja paimaimahon, songon sanggah panorang ni si Noak ma porini. Ipakei do sagala panorangni bani soal-soal na mangan pakon na minum, mamboli pakon manjual martidah pakon manabi, marunjuk pakon marpanayok. Seng dong panorangni mangindahi Naibata pakon harajaon-Ni. Jadi anggo roh Anak ni Manisia in sanggah sonai, lang be sirsir ia mangalo-alo Anak ni Manisia in bani parrohni ai, lang be masuk ia hu harajaon ni Naibata i Nagoriatas.
Pingkirhon hita, ma ai, gendo sirsir hita mangalo-alo Anak ni Manisia in roh honsi Ia paduahalihon.
Ingat hita ma sedo pitah dousa na banggal boi manutup labah ni surga banta. Tapi anggo na mangan pakon na minum hansa ikaji hita, cari makan hansa horjanta bani goluh on, gabe lang sompat be mambogei hata ni Naibata, sonai homa anggo mamboli pakon na manjual hansa ikaji hita, hape lang be sungkup panorangta mansari goluh na baru marhitei pardomuanta pakon Tuhan Jesus, sonai ma hita, sompong idorab ari ai.
Nini Sintua Josep Dasuha, ase sonang anjaha ulang gaor, porlu nabotoh marbagi panorang, pakon marbagi duit. Marbagi panorang ni ma na porlu mardomu hujon. Porlu dong panorangmu mandalankon parugamaon ari-ari. Ase boi hita jaga.
Ra dong do buei mambur panorangmu, atene? Humbani panorangmu na mangkamambur ai ipindo Naibata bere ham Bani. Pakei Ham ma panorangmu mambalosi Naibata, mambogei hata-Ni. Ase tagam janah sirsir ham bani panorang parroh-Ni holi.
Ham Tuhan Naibata, Bapanami! Pajaga Ham ma hanami marhitei TonduyMu, ase jaga janah sirsir hanami paimahon parroh ni AnakMu ase ialo-alo hanami Ia. Amen.
Haleluya No. 184: 4: Manjaga ma Hanima >>
4. Barah ma roh Tuhanta marjaga nasiam;
Tangihon golpa-golpa, na dob ibogei ham!
Melele siang ari, lao ma na golap in;
Dohor ma panorangni, lihar ma ari in.
Recent Comments