Marolob-olob anjaha marmalas ni uhur do ahu bani idop ni uhurmu, ai ikawahkon Ham do hadoyukonku, anjaha ibotoh ham do hasosakan ni tonduuyhu. (Psalm 31: 8)
Haliahon pakon parlajoan gati do roh ibanta sadokah i tanoh on hita. Ra do badanta marsitaronon, ra do homa uhurta, ra do homa tonduyta mangarou.
Ibagas sitaronon pakon pusok ni uhur sai roh do parlajoan banta. Sai ujionni do ase lupa hita bani Bapanta na Nagoriatas mangkaholongi hita.
Bani parlajoan sisonai ibogei uhurni do: Seng dong be partolongan bam, banggaltu do dousamu, domma mandarat ho hun lobei ni Naibata, seng dong be haluahon ham.
Bani panorang sisonai ai ma porlu tumang naahap na dob ibagas parlajoan do hita, pamatang ampa tonduyta.
Age pe sonai ulang ham ra misir hun lobei in Naibata. Mintor dompakkon ham Naibata mangkatahon: Maidop ma uhurmu bangku, Ham Naibata na tarsosak do ahu. Borat do sitarononku, songon na so tarporsan ahu be. Tarolos ma Ham Tuhan mangurupi ahu. Roh ma Ham martolong ahu. Ulang tulak ma hun lobeimu,ai Ham do Naibata ni hatuahonku. Apoh ham ma uhurmu marhitei hata bagah-bagah on: “Dohor do Tuhan in bani sagala na mandilosi, bani ganup na mandilosi ibagas hasintongan” (Psalm 145 :13).
Mardilo do ia (parpesalmen) bani Tuhan ibagas sitarononni, ipaluah do ia humbani hasunsahanni. Martenger ni uhur hu Bamu do ahu Tuhan, nini. Ise do na boi marolob-olob janah marmalas ni uhur halani idop ni uhur ni Naibata? Ai ma na mangkaporsayai na dob itatap Naibata hadoyukonni ampa hasosakan tonduyni, ai ma na dob ibalosi Naibata tonggoni, ipalumbang hasosakanni, itangihon tonggoni. Seng tarbador na martenger ni uhur bani Naibata.
Ongga ma idagei ham hasosakan na sonai? Ongga ma iahap ham partolongan ni Naibata?
Ham Tuhan Naibata! Ibagas hasosakan do ahu, pamatangku ampa tonduyhu, paluahi Ham ma ahu. Martenger ni uhur hu Bamu do ahu, ai hubotoh seng, anjai tarbador ahu. Amen.
Haleluya No. 121: 1, 3, 4: Jesus Goluh ni Tonduyhu >>
1. Jesus goluhni Tonduyhu, ham do haporusankin.
Anggo tumpu bai tonduyhu bolis pakon setan in.
3. Bai musim ni haba-haba pinaroh ni musuhkin,
Togu au das hu labah bani parsaranan in.
4. Sai dingdingi Ham o Tuhan, au na sihol roh bamu.
Sa papodas pagoluhkon, se na ondos hu Bamu.
Recent Comments