Tapi nini malekat ai ma hubani sidea: Ulang mabiar hanima! Tonggor ma, ai ambilan malas ni uhur banggal do huboan bannima, parulihan ni ganup bangsa. Ai domma tubuh bannima saborngin on, i huta ni si Daud, Sipaluah in, in ma Kristus Tuhan in! (Lukas 2: 10, 11)
Igoki biar do jolma na i tanoh on, biar bani na so niidah, biar bani na niidah. Songon dakdanak na marumur satahun do jolma, anggo ganggang humbani inangni hira habiarni do ganup. Tapi anggo ombah do ia bani inangni, age aha roh seng ia mabiar, age mardalan golap pe.
Mase igoki biar hita jolma? Halani ganggang hita humbani Bapanta Naibata, ai do. Lambin roh daohni hita lambin buei ma habiarta. Tapi dob roh Sipaluah, boi do na porsaya Bani maluah humbani biar ai. Ai marhiteihonsi boi mardomu use na porsaya bani Naibata gabe Bapani. Aha pe lang habiarni be age mardalan golap bani goluh on.
Age bani hita Kristen, anggo hurang do rapatta bani Naibata. iparbiar-biari na i tanoh on do hita: Begu ganjang, pontianak, ronsi dumut tene, pusukbuhit, ipajagar halak goranni gabe rudang-rudang. Lambin tambah ope sihabiaranta anggo lang mulak darngos hita bani Bapanta Naibata.
Barita malas ni uhur banggal do partubuh ni Tuhan Jesus. Domma honan ham bani malas ni uhur ai? Marsibanggalan do sagala malas ni uhur i tanoh on, dong malas ni uhur ni sahalak, dong malas ni uhur ni na satangga, malas ni uhur ni na sahuta, malas ni uhur ni sanagori, malas ni uhur ni sabangsa. Tapi sibanggalan, ai ma malas ni uhur ni sagala bangsa, malas ni uhur ni sin dunia on. Ai marhitei Tuhan Jesus boi mulak ganup jolma humbani dousani hubani Naibata.
Domma honan ham bani malas ni uhur ai? Halak na tartutup pe atap na tarsangkut, malas tumang do uhur-Ni anggo dong na paluahsi.
Ase boi marmalas ni uhur hita bani parroh ni Tuhan Jesus, ningon iahap hita do samborni na nirahut ni dousa, nirajaan ni sibolis. Anggo sonai lang tarbahen lang malas uhurta manjalo Sipaluah ai.
Tarima kasih ma Bamu Tuhan Jesus, halani ra do Ham roh hu tanoh ni pardousa on laho paauahkon hanami. Amen.
Haleluya No. 37: 1-3. Hatuahon do, Hamegahon do >>
1. Hatuahon do hamegahon do partubuhonni Jesus in
Roh Sipaluah bani na magou, megah-megah ma uhurta in
Roh Sipaluah bani na magou, megah-megah ma uhurta in
2. Hatuahon do hamegahon do partubuhon ni Jesus in
Rapat ma hita, bai Naibatanta, megah-megah ma uhurta in
Rapat ma hita, bai Naibatanta, megah-megah ma uhurta in
3. Hatuahon do hamegahon do partubuhon ni Jesus in
Megah uhurta bani Tuhanta, megah-megah ma uhurta in
Megah uhurta bani Tuhanta, megah-megah ma uhurta in
Recent Comments