Podas ma ho mardear pakon imbangmai, sanggah rap ope ho pakonsi i pardalanan, ase ulang iondoskon imbangmai holi ho hu panguhum, gabe iondoskon panguhum ai ho bani upasni, anjaha inahkon ho hubagas tutupan. (Mateus 5: 25)
Sadokah i tanoh on hita, sai dong do martorap na marsogam ni uhur banta, atap na marimbang-imbang pakon hita. Anggo sogam uhur bani hasoman, borat do uhur diri halani pambahenni. Tapi sedo ia na boritan, hita do ai borit uhurta ibahen. Ase uhurta do na borit anggo sogam uhurta dompak hasoman, sedo uhurni. Ai sai napingkiri do hahuranganni, na hurang ni imbang-imbangta ai manggoki uhurta ampa pingkiranta. Hurangni ai ma ibagas ulunta, ijujung hita.
Halani ai iojur Tuhanta do hita ase podas mardamei pakon imbang-imbangta ai, ase borsih janah sonang uhurta, maluah uhurta, mardeka uhurta.
Holong ni Tuhanta mangidah hita do ase ipagolpa hita podas mardear, podas mardamei. Sedo pitah hita na lambin dear ijai dihut do imbang-imbangta ai. Maluah ma hita humbani domdom, sonai homa imbangta ai domma gabe hasomanta use. Anggo lambin dokah marian-ian sogam atap domdom ni uhur ai dompak hasoman, seng lambin surut sogam ai tapi lambin tambah do.
Tapi sada na porlu, tonggohon hita ma homa imbangta ai, ase dear uhurta dompak imbangta ai, ase dear uhurni dompak hita. Harga tumang do ai. Ingat hita ma si Jakob na martonggo ilambung bah Jabok, domma roh imbangni hinan si Esau mamboan 400 halak tenterani marsiboan tanjani. Dob ibalosi Naibata tonggoni pajumpah sidea gabe marsumah mando, na dob dokah sirang. Seng martaringat be tentera pakon tanja ondi.
Laho mardear pakon imbang-imbang diri, toruh ni uhur do sada na porlu ijai. Janah ulang napatidak hapintoron diri. Ambah ni ai manasap pakon mangkalupahon salah ni hasoman. Anggo marimbang-imbang jolma, atap maringor (martinggil), surut ma hasoman diri, matopik ma tanoh dogeon, ai sai nasimbili ma hun lambung ni imbang-imbang diri ai.
Ham Tuhan Jesus! Urupi Ham ma ahu mandalankon podahmu on, ase podas mardamei ahu pakon imbang-imbangku. Padamei Ham ma uhurhu ibagas, ase dihut imbangkai hutonggohon. Amen.
Haleluya No. 19: 1, 3: Damei do Nimu Bereon >>
1. Damei do nimu bereon, Jesus bani bangsa-Mu,
Tonduy-Mu do pasaudkon, hata bai jabolon-Mu,
Na doyuk janah masombuh, au seng patut rongkon Ham
Tonduy Na Pansing ma suruh ‘se gogoh manombah Ham.
3. Sada horjaonkon nami, ipindo uhur-Mu in;
Ningon holong atei nami, bai hasomannami in
Ase roh ma gogohnami, mangkorjahon hata-Mu.
Mangkahulhon diri nami bai hasoman ‘pa Bamu.
21 Desember: Paturut Hatani pa Tonduyni Marhorja Ibagas Dirimu >>
Recent Comments