Tubuhan anak ma ia, anjaha bahen ma goranni Jesus, ai paluahonni do bangsani humbani dousa ni sidea. (Mateus 1: 21)
Porsaya bani Jesus Kristus, ijai ma dapot hasasapan ni dousa, masuk ma hita gabe siminik ni Naibata, na dob pinaluah ni Jesus Kristus. Sadokah ni on dousa do mangkuasai dirini, dob porsaya gabe hita ma mangkuasai dousa ai.
Seng marosuh Naibata ikuasai dousa hita, halani ai do ase isuruh Anakni paluahkon hita humbani dousa pakon kuasani, sedo pitah isasap dousanta, ibere do homa gogoh banta manlawan dousa ampa sagala parlajoan.
Domma italuhon Tuhanta sibolis pakon sagala parlajoanni sadokah i tanoh on Ia ijia, sihol sonai ma homa hita monang uhur-Ni mangimbang sibolis pakon sagala parlajoan bihenni.
Ningon manjalo gogoh do hita humbani Tuhanta laho mangimbang dousa pakon sagala parlajoan. Ningon Tuhanta hasomanta, na mangurupi hita na galek on, ase margogoh. Luaronkonta ma songon hinatahon ni Apostel Paulus (Pil. 4: 13): “Haganupan ai tarbahen ahu marhiteihon na margogohi ahu”.
Roh ma hita bani Tuhan Jesus manjalo pasu-pasu haluahon. Ari-ari ma hita martonggo hu Bani mangindo gogoh mantaluhon dousa. Dob ipatuduhkon Tonduy ai banta dousa ai lambin alus ma pangahapta mananda dousa.
Malas ma uhurta ra do Tuhan Jesus mangkasomani sagala na dob pinaluahni. Haluahon humbani dousa, ai ma sada hata na mantin. Halani anggo maluah ma hita humbani dousa, boi ma hita, masuk hu harajaon Nagoriatas. Dob tardidi hita ijai ma hita manjalo tanda ni haluahon ai. Anggo porsaya hita botul bani Tuhan Sipaluah ai, saud ma hita maluah humbani dousanta. Tapi maningon atok janah porsaya botul do hita bani haluahon tinagang ni Tuhan Jesus ai, ai do ase saud hita maluah.
Ham Tuhan Jesus! Patenger Ham ma uhurnami mangkaporsayai haluahon na tinagangmu marhitei sitaronon pakon parmatei-Mu. Amen.
Haleluya No. 133: 2, 5: Holong do Atei >>
2. Tarsangkut ahu ibahen dousa ,
hape idingat Tuhanku au.
Ai do ‘se ningku tong:
Holong do atei ni Naibatangku mangidah au.
5. Itaron Jesus do hamateian,
manggalar utang ni dousangkin.
Ai do ‘se ningku tong:
Holong do atei ni Naibatangku mangidah au.
Recent Comments