11 Desember: Monang Manlawan Diri

Humbani panorang ni si Johannes Pandidi ronsi sonari sigogohonkon do masuk hu Harajaon Nagoriatas ai anjaha na manggogohkon ai do dapotan. (Mateus 11: 12)

Sibere-bere do banta harajaon Nagoriatas ai, seng hita mamboli, seng ibahen hargani. Ai do hansa pambolinta: roh hita, anjaha ijalo hita.

Tapi porlu ipakei hita sihol ni uhurta. Ningon gogohi hita do mambasa hata ni Naibata, pongkutkon hita marimbagaskonsi. Ningon tangi janah pongkut do hita manangihon husip ni Tonduy na Pansing banta. Ningon lawanonta sagala na manirang hita humbani Naibata. Ningon isopotkon hita dousanta hubani Naibata janah sirang hita humbani dousa. Anggo lang sonai seng boi masuk hita hu harajaon Nagoriatas ai.

Ija do sanggup ahu mangkorjahon ai? Ra sonai nimu: Hunja do ringgas ni uhur pakon gogoh mandalankon ai? Ai galek do ahu, seng margogoh mangimbang sipanlajou, seng boi huparorot bangku.

Tongon do ai. Tapi anggo ra do ham mamakei gogoh na binere ni Naibata bamu, boi do ai. la do mangkatahon sigogohonkon do masuk hu harajaon ni Naibata. Ra do la mambere gogoh banta ase boi igogohkon hita masuk hu harajaon Nagoriatas ai. Anggo ibasa Ham hata ni Naibata, manjalir ma bamu gogoh na humbani Naibata na jinalo ni haporsayaonmu.

Ninuhur ni buei halak, urah do masuk hu harajaon ni Naibata harajaon Nagoriatas, julur do songon mardalan i hanopan. Seng sonai. Songon na manangkog do. Dong do sigogohonkon.

Paruntolon banggal do na pagoling uhur paubah sisombahon, paruntolon do mangimbang dousa. Paruntolon do manlawan hagalekon pakon gijang ni uhur ampa uhur haut. Paruntolon do manlawan rayoh, sogan.

Ase, buei do sigogohonkon. Buei hauhuron sipaubahon, parlahou sipadearon. Ningon maruntol do hita manlawan dirinta, na borat, dompak horja harosuh ni Naibata. Ija hita marayoh ijai ma sigogohonkon. Ija hita madolnat ijai ma sipahinsahon. Ningon monang hita manlawan dirinta, ijai ma na manggogohkon ai.

Ham Tuhan Jesus! Urupi Ham ma ahu ase sai sihol janah porlu uhurhu bani harajaon Nagoriatas ai. urupi Ham ma ahu mantaluhon diringku, hagalekonku. Amen.

Haleluya No. 110: 1, 3: Payah ai Tungkis Tumang >>
1. Payah ai tungkis tumang dalan hu nagori atas.
Tapi martuah tumang halak na ijin mamontas.
Mangirikkon Jesus in, torus hu ujungni in.
3. Ai sab daroh na hinan, na gantung bani parsilang.
Ihirahon do hinan upah na marhasurungan.
Non ijia hata-Nin :”Domma gonap horjangkin,”