“Domma Marpunsa” (Johannes 19 :30)
Marpunsa ma goluh ni Tuhan Jesus i tanoh on. Roh do Ia gabe Anak ni biri-biri ni Naibata na mamorsan dousa ni dunia on. Iboan do naboritta ampa hadoyukonta iporsan. Ia do manaron panlanggaronta. Marhitei ugahni malum iahap hita. Horja-Ni na banggal ai domma dob, domma marpunsa. Domma marbuha nagoriatas. Domma marpunsa. Malas ni uhur domma ipasirsir bani jolma pardousa. Dihut do goluhmu sonari age magira ihamkam hata ai: Domma marpunsa
Jadi dihut ma ham marmalas ni uhur anjaha martarima kasih halani na dob ipasirsir hasasapan ni dousa bani jolma manisia?
Domma dihut ham mardamei halani silang ni Tuhan Jesus? Ningon boi iluarhon ham humbani sintong ni uhurmu: Isasap Naibata do dousangku, halani Tuhan Jesus, ijalo do ahu gabe niombah-Ni, domma marbuha surga bangku. Domma salih ahu gabe anak ni Naibata domma sirsir hasonangan bangku i surga. Marolob-olob ma tonduyhu mandodingkon: Haleluya!
Tapi anggo nape boi ham marmalas ni uhur mardingat ai, manrogop ma ham itoruh ni parsilang ni Tuhan Jesus. Mangkawah ma ham bani Jesus na tarsilang in halani dousamu. Itaron Tuhan Jesus sonai Ia, ase iporsan dousamu. Horja hasasapan ni dousanta ai ma na dob marpunsa bani hayu parsilang ai!
Pindoonta ma bani Tuhanta, ase ipatidak Tuhan rusia ai banta marhitei Tonduy-Ni, sonai banggal ni holong-Mu bannami sonaha palaron-Mu bannami. Sai iarusi uhurnami ma in gabe haluahonnami.
Anggo iarusi uhurmu ma rusia banggal on, ijai ma mardamei ham pakon Naibata, sonang ma uhurmu. Lambin gara ma haporsayaon pakon pangarapanmu.
Ham Tuhan Jesus! Napuji, ma goranMu na pansing in. Patidak Ham mYfrtini tonduyhu: Domma sasap dousangku, domma dob haluahonku ibahen Ham janah ahu domma gabe anak ni Naibata. Amen.
Haleluya No. 58: 1 ,2: Sada do Hansa Sura-surangku
1. Sada do hansa surang-surangku bai ganup dunia on.
Seng anjai lang malas uhurhu anggo jumpah au ma on
Sihol sai ingaton ni uhurhu na binaen ni Jesus bai tonduyhu
Sanggah pinorsan-Ni in haganup dousangkin.
2. Ningon Ia do tongtong ingaton sanggah na tarpaku in.
Bai parsilang in igantungkon, sai madaurus daroh-Nin.
Ai mangkopkop au parah horah-Ni, ase dihut au gabe upah-Ni;
Ikawahkon do au on, ihatahon: ”Domma dob”
Recent Comments