“Pasangap ma goranmu Bapa”. (Johannes 12: 28)
(Terjemahan baru, 1976, Ham Bapa, pasangap Ham ma goranmu!)
Tujuan sibanggalan bani Tuhan Jesus i dunia on, pasangapkon pamuliahon goran ni Bapani Naibata na i nagoriatas.
Ongga do ipingkiri ham sonaha pamuliahon goran ni Naibata? Atap ipingkiri ham atap sonaha laho pasangap goranmu hansa atap ampa ise ham mardomu. Sonaha dirimu do hansa isurahon ham. ihaholongi ham, ase marsangap ampa marmulia?
Ingat ham ma: Na mangkaholongi hosahni, laho mangagouhonsi do, tapi na marnalang dirini janah pasangapkon Naibata, ai do pagoluhkonsi.
Sonaha do hita boi pasangapkon, pamuliahon Naibata? Anggo iihutkon hita Tuhan Jesus janah sai iparpala-palai hita mangusihi-Si sadokah i dunia on Ia, pasangap Naibata do hita ijai.
Ongga ma iuji ham mamalang dirimu ase boi ipasangap ham Naibata, laho mandalankon rosuh-Ni ampa mambahen rosuh ni uhur ni na legan (hasoman). Laho pamuliahon goran ni Naibata, ra ma hita mangkatahon bani Naibata humbani tongon ni uhurta: “Ijon do ahu Tuhan, pakei Ham ma ahu mambahen rosuh ni uhurmu. Ra do ahu manaron asal marmulia goran-Mu!” Dob ai dalankon ham ma padanmu ai, ulang singgan hata na so marisi. ljai ma ham na mangihutkon Jesus.
Ia Tuhan Jesus, songon hatani do iparlahouhon, songon parlahouni do hatani. Anggo hita jolma gatian do seng dosdos hatanta ampa parlahouta, sai ganjangan hatanta, tading parlahouta. Halani ai pindoonta do bani Naibata, ase isuruh Tonduy na Pansing ai, ase ipasintong uhurta hatanta. Isuan homa sura-sura banta: Sai sihol pamuliahon goran ni Naibata ampa goran ni Tuhan Jesus. Janah iurupi ma hita patoruh dirinta, ulang hamuliaon ni dirinta ipindahi hita, gabe tading hamuliaon ni Naibata.
Ham Tuhan Jesus! Suruh Ham ma Tonduymu hu bannami ase boi hupasangap janah hupamulia goranmu pakon goran ni Bapa in, marhitei hata pakon pambahenannami. Amen.
Haleluya No. 107: 1, 4. Irikkon Nasiam ma Au >>
1. Irikkon nasiam ma Au, nai hatani Tuhanta
Sai parnalang ma dirimu, hatangku malah harga
Sai mambur bahenlah ganup, parlahoumin na so talup
4. Na toruh uhur do Au on, sai tong holong atei-Hu,
Lamlam uhur-Hu, ai tongtong lamlam homa hatang-Ku,
Tongtong hutatap Naibata, ai pe Au on ihutkon ma.
Recent Comments