“Mangihutkon pingkiran nami sandiri do hanami mandalankon hajungkaton ni uhurnami na jahat in”. (Jeremia 18:12)
Naibata mangkatahon hubani halak Israel: Mulak ma ganup humbani dalanni na jahat in. Bahen ma dalanmu ampa parlahoumu na dear. Tapi itundali sidea do Naibata. On do balosni: “Mangihutkon pingkirannami sandiri do hanami”.
Seng ra sidea mambalosi Naibata, tapi ibalosi do pingkiran ni sidea sandiri na jahat ai.
Sonai do balos ni buei jolma bani panorangta on. Age pe roh na manaksihon Kristus, mangkatahon ase mulak sidea hubani Naibata janah itadingkon dalanni na jahat ai. Tapi seng ra sidea mambalosi Naibata, isuhuni sidea do pangindoan ni uhurni na jahat, seng ihargahon sidea Naibata pakon Hatani.
Sonaha do balosta bani Naibata anggo ipagolpa hita? Sonai do homa luaronkonta: Mangihutkon pikirannami sandiri do
hanami? Marpingkir ma hita lobei.
Lang patut sonai luaronkonta balosta, balos ni uhur na manendel do ai. Patut do hormat hita dompak Naibata. Ulang ma martahan hita manggoluh ibagas dousa. Patut do mangaku hita ilobei ni Naibata na mardalan ibagas dousa do hita. Ipio Naibata do hita, ase iakuhon hita sagala dousanta anjaha marpadan hita manundalhon dousanta ai. Sonai do patut balosta bani Naibata, na marmulla in.
Dong do deba na mangkatahon, anggo idilo Naibata ahu maningon roh do ahu. Hata tugan ni halak na so mananda dirini do ai. Bani halak sisonai porlu tumang, ase roh Tonduy ni Naibata patandahon dousani bani sandiri.
Ra do Naibata mambere Tonduyni anggo napindo humbani tongon ni uhur, ase Tonduy ai patandahon dirinta banta. Anggo itanda hita ma dirinta, ididah hita do ijai buei ni pangindoan ni angkulanta, janah ididah hita do maholni mandalankon harosuh ni Naibata. Tapi martuah ma na mantaluhon dirini janah pasaudkon harosuh ni Naibata.
Ham Tuhan Naibata! Urupi Ham ma ahu marhitei Tonduy-Mu, ase hutanda diringku janah malas uhurhu mambalosi Ham. Amen.
Haleluya No. 148: 1,2,4: Layak do Ham Mambere Au >>
1. Layak do Ham mambere au , O Jesus Tuhankin,
Ihutkon Ham daoh pe au, mambuat uhurhin.
2. Pardousa na banggal do au, pansing do anggo Ham ;
Sai bai na dorsa laho au bai na jahat naman .
4. O, Jesus sai tangihon on, padaoh Ham jahatkin ;
Pansing ma baen Ham uhurhon, ase sai sonang in.
29 Agustus: Hapintoron-Ni gabe Hapintoranku >>
<< 27 Agustus: “Jaga ma nasiam…. maruhur jahat”
tnt160828
Recent Comments