“Ra do Ahu, susi ma ham! ……. Roh pe ahu pamalumkonsi”
(Mateus 8: 3, 7)
Nini na gadamon ai dompak Tuhan Jesus: “Tuhan, anggo ra Ham tarpamalum Ham do ahu”. Balos ni Tuhan Jesus: “Ra do Ahu susi ma ham!”
Ibasa hita do: Jadi mintor malum ma gadamni ai. Ipudi ni ai ibasa hita do roh sahalak komandan bani Tuhan Jesus mangkatahon: “Tuhan, tibal do i rumahku juak-juakku, oyangon, parah do pangahapni”. Sampang ni Tuhan Jesus: “Roh pe Ahu pamalumkonsi”.
Lang dihut do barita on mamuhoi uhurmu mangindo partolongan bani Tuhan Jesus? Ra do ipingkir ham homa seng talup ham mangindo partolongan bani Tuhan Jesus. Lang pag ham martonggo hu Bani. “Ai butak do ahu seng dong na madear ibagas diringku”. Ai ma mambahen lang pag ham mangindo tolong bani Tuhan Jesus, lang pag ham martonggo hu Bani.
Anggo mabiar ham, bahen ham ma songon binahen ni komandanni: Seng ipindo partolongan, ituri-turihon do hansa haboratanni. Mase lang ra ham patugahkon bani tonggomu haboratanmu? Mase lang ra ham patugahkon dousamu hu Bani?
Anggo hurang atok ni uhurmu atap ra Tuhan Jesus manolong ham, hatahon ham ma songon hata ni na gadamon ai: “Tuhan, anggo ra Ham tarpamalum Ham do ahu”. Anggo sonai roh ma balos ni Tuhan Jesus bamu: “Ra do Ahu, susi ma ham!”
Pamalumonni Jesus do habutakonta. Ipasusi Tuhan Jesus do hita humbani dousanta, ai do tujuanni ase susur Ia hun nagoriatas hu nagoritongah on. Ai do tujuan ni Anak ni ni Naibata mamorsan dousa ni hajolmaon. Ai do ase matei Tuhanta bani hayu parsilang na so ingkat salahni, ase Ia mamorsan naboritta. Ai do ase tardidi hita, ase ipasusi hita humbani sagala dousanta.
Tonggo
Ham Tuhan Jesus! Na bayak do Ham bani idop ni uhur pakon holong ni atei. Pasusi Ham ma hanami. Amen.
Doding
Haleluya No. 150: 1, 2. Lauja do Ho na Loja in >>
1. Lauja do ho, naloja in, binaen ni dousamin?
Seng jumpah ho na sonang in, i parlajanganmin
halani in, sai mulak ho!2. Ompaskon pusok uhurmin bai Tuhan Jesus in.
Sai boban ganup dousamin bai Sipagoluh in.
Nai ma tongon, sai roh ma ho!
Recent Comments