Ipaturut hannima ma roh dakdanak in das hu Bangku, ulang pandang, ai bani sisonin do Harajaon ni Naibata.
(Markus 10: 14)
Terjemahan baru: “Paturut hanima ma dakdanak in roh hu Bangku, ulang pandang hanima sidea, ai bani halak sisonin do harajaon ni Naibata (Markus 10:14)
Hata na i atas on ma sada na songon pasu-pasu hitei ni namatoras mansahapkon pasal Tuhan Jesus bani niombahni na etek age na banggal pe. Mamodahi sidea manangihon hata ni Tuhan Jesus ampa martonggo hu Bani, sonai mansuhutkon haboratanni. Jadi dob masuk dakdanak in hu masyarakat dunia on atap ija ia lungunan ibagas jut ni uhur pe, sanggah sahalaksi iahap sauhur idingat ma podah ni namatorasni hinan, gabe roh ma ia martonggo hu Bani Tuhan Jesus.
Seng dong namin namin bapa atap inang Kristen na mamandang niombahni ulang roh bani Tuhan Jesus. Tapi anggo lang itogutogu hita niombahta ase roh bani Tuhan Jesus, doskon na mamandang do ai, songon na mangulangi do ai homa.
Dua do dalan na dumpar mangajari dakdanak pasal manogu-nogu dakdanak bani Tuhanta: Mangajarhon hata ni Naibata, mangajarhon martonggo ampa mamuji Naibata dob ai manonggohon sidea.
Tapi dong ape sada dalan na margogoh homa: mambahen tiruan (usihan) ase romban parlahouta pakon podahta, sonai homa hatanta, ronsi pambahenanta. Porini haru pe uhurmu pasal dakdanak in, songon na so asi podah pakon tonggomu pasal sidea, tapi ulang ham mondolei, totap tonggohon ham bani Naibata. Longang do ham holi mangidah pambalosi ni Naibata bani tonggomu. Ningon tenger uhurmu mangkatahon: Seng ipaturut Naibata magou anak atap boru na tinonggohon.
Tonggo
Ham Tuhan Jesus! Paringgas Ham ma uhur ni namatoras haganup manogu-nogu niombahni hu Bamu. Pagolpa Ham ganup anak pakon boru ase itangihon podah ni orang tuani. Amen.
Doding
Haleluya No. 199 : 1, 3. Piga Bintang na i Langit >>
1. Piga bintang na i langit, domma ibilangi ho;
Piga hombun na mardalan, ongga do ihira ho.
Naibatanta do mamilang ganup bintang na marlinang
Ulang magou age sada, ai ganup do in harga.3. Piga anak pakon boru na iatas tanoh on,
Na hotop marguro-guro i alaman in tongtong?
Megah uhur ni Bapanta bani haganup sidea,
Sai holong tumang atei-Ni na mangidah hita da.
Recent Comments