Marmalas ni uhur ma nasiam tongtong ibagas Tuhan in; huulaki ma mangkatahon: marmalas ni uhur ma!
(Pilipi 4 : 4)
Ise na mardousa dompak Naibata janah na mangahap marulak-ulak ia italuhon dousa, sirang ma ia humbani Naibata; mahol do marmalas ni uhur halak sisonai ai. Halak na mambahen hasunsahan ni hasomanni seng boi ai marmalas ni uhur, seng boi ai mardamei. Halak na marsogam ni uhur atap na mardomdom dompak hasomanni, ai pe seng tarbahen marmalas ni uhur. Halak na manimpan dousani pe seng tarbahen marmalas ni uhur. Halak na marsonang-sonang janah na mardamei do boi marmalas ni uhur.
Hata ni Apostel Paulus do na i atas in bani Kuria Pilippi. Ijai do ongga apostel ai tartutup halani Ambilan na Madear. Ibagas tutupan ai do ia, ijia martonggo pakon mandoding mamuji Naibata, halani boi ia manaron halani gorar ni Tuhan Jesus.
Ase boi do apostel ai marmalas uhur, age domma ilonsingi ia itangkap masuk tutupan. Na somal ibagas pusok ni uhur ma ia namin. Domma iparlahauhon apostel ai podahni ai bani Kuria Pilippi ai.
Mase boi marmalas ni uhur apostel ai? Halani ibagas Tuhan ia. Idarat ni Tuhan seng dapot malas ni uhur na manongtong. Tapi ibagas Tuhan dapot do malas ni uhur ai.
Porlu do malas ni uhur bani goluh on bani hita jolma. Boi do malas ni uhur ai padoras horja, padear horja anggo malas uhur mangkorjahon horja ai, boi do malas ni uhur ai pahisar pamatang. Ai do ase porlu pangkatahon ni apostel ai pala dua hali ihatahon: “Marmalas ni uhur ma nasiam!” lbotoh apostel ai i darat ni Tuhan seng dapot malas ni uhur na manongtong ai, ai ma ase ihatahon “ibagas Tuhan in”.
Anggo ipungkorhon hita uhurta mar-Tuhan, marugama, marhitei tonggonta ampa panangihonta bani hata ni Naibata, ijai ma hita masuk hubagas Tuhan, janah boi marmalas ni uhur.
Tonggo
Ham Tuhan Jesus! Tarbahen do marmalas ni uhur ahu ibagas malas ni uhurmu. Urupi Ham ma ahu ase malas uhurhu padaskon sura-suramu pakon mangidangi Ham. Amen.
Doding
Haleluya No. 37: 1 – 3: Hatuahon do, Hamegahon do >>
1. Hatuahon do hamegahon do partubuhonni Jesus in
Roh Sipaluah bani na magou, megah-megah ma uhurta in
Roh Sipaluah bani na magou, megah-megah ma uhurta in2. Hatuahon do hamegahon do partubuhon ni Jesus in
Rapat ma hita, bai Naibatanta, megah-megah ma uhurta in
Rapat ma hita, bai Naibatanta, megah-megah ma uhurta in3. Hatuahon do hamegahon do partubuhon ni Jesus in
Megah uhurta bani Tuhanta, megah-megah ma uhurta in
Megah uhurta bani Tuhanta, megah-megah ma uhurta in
Recent Comments