Manggoluh Mangihutkon Rosuh ni Naibata

 

“Ai ganup do hita seng manggoluh bani dirini ni anjaha ganup do hita seng dong matei bani dirini”. (Roma 14 :7)

Sonai do hita on homa seng manggoluh bani dirinta. Gok bani Naibata do goluhta. Anggo torang iantusi hita ai, tontu seng ipindahi hita hasangaponta, tapi hamuliaon ni Naibata do.

Mambalosi Naibata do pargoluhonmu ari-ari atap manggoluh ham mambalosi dirimu. Atap sai ipingkiri ham do pasal ham hajorgitonmu tumang? Gati do ipingkiri ham pasal goluhmu na so ra bois ai? Ongga do isungkunkon ham ibagas uhurmu, sonaha do pargoluhonku harosuh ni Naibata? Aha do ipindo uhur ni Naibata sibahenonku?

Ingat hita ma na dob tarlobih do pambahen Naibata banta, isalihkon hita gabe bangsani. Anakni gabe Sipaluah hita humbani dousa ase gabe Ia sibalosanta. Ibahen Naibata do ai banta halani holong ni ateini Banta.

Sonaha nape patut hita mangkaholongi homa? Holong ni uhur bani Naibata, artini manggoluh ampa Naibata, manggoluh bani Naibata. Holong do uhurni bani Naibata.

Halak na manggoluh bani dirini, seng holong uhurni ham Naibata. Buei do hita na mardomu uhurni bani uhur ni Naibata, tapi seng idalankon.

Halani ai pindo hita ma gogoh humbani Naibata, ase margogoh hita mandalankon harosuh-Ni na pansing ai. Halani ai patoruh hita ma uhurta, ase sagala pinindo ni uhurta (sinta-sintanta), ase itoruh ni rosuh ni Naibata ma ai.

Ulang be namin dong salisi ni rosuh ni Naibata ampa rosuhta, gabe sada ma hita pakon Naibata. Pargoluhon sisonai ai ma pargoluhon na sonang.

Anggo sonai bani ganup silahoanta, sibahenonta, manungkun ma hita tong bani Naibata “uhur-Mu ma na saud”. Ai lang pe ham marosuh, uhur ni Naibata saud do. Pasomal-somalonta do ai marondos bani Naibata, ase Ia pasaud harosuhni banta.

 

Ham Tuhan Naibata! Urupi Ham ma ase ulang manggoluh ahu bani diringku, tapi manggoluh mangihutkon harosuh-Mu ma ahu. Amen.

Haleluya No. 4 :3,5: Puji Jahowa na Sangap

3. Puji Jahowa na sirsir manompa dagingmu.
Janah tongtong do manumpak jorgit pamatangmu.
Gati tumang roh partolongNi hubam sanggah roh ni hasosakan.
5. Puji Jahowa tonduyhu pasangap Goran-Ni.
Pakon ganup na marhosah mamuji hu Bani.
Ai do talup, baenon ni hita ganup, dodingkon hita ma Amen.

tnt0716