Na mangkatahon: hatahon ma bani boru Sion: Tonggor ma, Rajamu roh bam, lamlam maruhur, anjaha mangajak halode boru-boru ampa anak ni halode boban.
(Mateus 21: 5)
Bani bona ni Minggu Adventus, roh ma hata na iatas on bogeonta. Roh do Tuhanta bani Kuriani marhitei Pandidion, marhitei Horja Banggal na Pansing, pakon marhitei Hatani. Roh do Ia marhitei sibere-bere na madear, goluh pakon damei.
Roh do homa Rajanta ai bani ganup pagori ni Kuria, bamu pakon bangku. Roh do la hu banta halani holong-Ni, holong-Ni na gara ai. Masuk do hita hubagas harajaonNi marhitei pandidion na pansing. Bani ari ai ihatahon banta: “Tonggor ma domma pala huuhirhon goranmu hubagas jampal ni tanganku haduasi” (Jes. 49 : 16).
Hunjia nari seng ongga lupa Tuhanta banta, siap arian do use roh Ia hu banta. Sai sihol tompaonni uhur nabaju banta. Sai sihol urupanni do hita ase sai mangkawah hita hu Bani Bapanta na i Nagoriatas ai. Urupanni do hita ase malas uhurta mangkorjahon harosuh ni Bapanta ai. Boi do ipargogohi hita sanggah galek, ra do la mangkasomani hita ibagas parlajoan. Ra do Ia manogu hita anggo hurang margogoh hita mandalani dalan dompak Naibata.
Seng Ia ra manadingkon hita. Inunut do horja-Ni laho patorsa hita. Ijuljul janah ipargogohi do hita mandompakkon Naibata. Dobni iboan ma hita bani hamuliaon ni Naibata i Nagoriatas. Ijai lang dong be dousa, lang dong be hagalekon. Hapansingon, malas ni uhur pakon pau-pasu mando.
Sonari todoh hita ma Ia gabe rajanta, sonai ma ari-ari. Bere hita ma uhurta gabe ianan-Ni, ase Ia raja ni uhurta. Idanganta ma Ia marhitei pargoluhonta.
Tarima kasih ma uhurta halani ra Ia pamasuk hita bani harajaon-Ni na gokan malas ni uhur ai. Hita pe malas ma uhurta itoruh ni kuasa ni rajanta ai.
Tonggo
Tarima kasih ma Bamu Tuhan! Halani ra Ham Tuhanku janah rajangku. Urupi Ham ma ahu ase hubalosi janah huidangi Ham. Amen.
Doding
Haleluya No. 33 : 1, 4: Na Roh hun Datas do Au on >>
1. Na roh hun datas do au on, ambilan na madear do
Anjaha na jenges tumang hubobam bani nasiam.4. lboban hagoluhan in, siluah ni Bapa-Ni in.
Ai sol bai Harajaon-Nin, paulakon-Ni jolma in.
Recent Comments