18 Nopember: “Anggo mardousa saninamu”

“Anggo mardousa saninamu, parayak anjaha ajari ma ia, hanima padua-dua. Anggo itangihon ho, gabe hasomanmu ma ia use.”

(Mateus 18:5)

Lang marosuh Naibata magou jolma, sada pe ulang haganup ma namin das hu hamubahon ni uhur janah manjalo idop ni uhur ni Naibata.

Sonai do homa pingkiran ni anak-anak ni Naibata. Holong do uhurni mangidah halak na sirang humbani Naibata. Sai sihol boanonni do mulak sisonai ai bani Nabata. “Anggo mardousa saninamu, parayak anjaha ajari“, artini: Patidak hahuranganni, tapi sedo manggilai, atap pahirihon.

Mamodahi, humbani holong do. Ningon tarahap parroh diri humbani holong do. Pindoon do humbani Naibata ase iparmaloi diri ase mangasi horja ai. Holongta pe seng asi anggo na itombei-tombei do hansa, ningon holong binere ni Naibata do, ase ipasupasu ham bani goluhmu ibagas sundutmu.

Gati do ibagas na pagolpahon hasoman hita, dong otik songon na pahirihon iahap na pinagolpa ai. Anggo sonai sedo hita na padohorhonsi hu bani Naibata, padaohkon do. Ibagas hata martuktodung do ai ponop, artini padua-dua hansa, seng dong na legan na mambogei, sobali Tuhan. 

Ia lang pe hita padohorhon hasomanta bani Tuhan, gendo ulang padaohkon.

Tarahap do bani hasomanta atap na roh hita humbani holong atap lang.

Laho mandalankon sisonai ai hita pindoonta do pangurupi ni Tuhanta banta.

Hasomanta na marhahurangan dompak Kuria, (uhurta) sai itangar hasoman do sihol pagolpaonta. Seng sonai, “martuktodung” do, padua-dua do, hita do hansa pakon siparayakon ai. Ra on do salahta pagolpa hasomanta atap na dob in.

Sai iurupi Tuhanta ma hita mandalankon podah-Ni ai.

Harga do sipaingat padua-dua. Halani ai anggo laho mardousa ididah hita hasomanta, bahen hita panorangta marayaksi. Ulang songon pingkiran somal: “Gendo ulang humbangku rohni”. Pingkiran sisonai ai manlopasi diri do ai. Tapi i lobei ni Naibata seng maluah hita sonai tumang. Pagolpaonta do ai janah tonggoonkonta homa.

Tonggo

Ham Tuhan Jesus! Tambahi Ham ma holong-Mu hu bangku, sai idingat uhurhu ma sonaha parsaoron-Mu naijia, gabe arihan bani parsaoronku sonari pakon hasomanku. Urupi Ham ma ahu pasal ai. Amen.

Doding

Haleluya No. 143: 1,4: O Tonduy na Manggoki Uhur >> 

1. O Tonduy na manggoki uhur, ni saksi-saksi na parlobei in,
Seng ongga-ongga marnamundur, mangimbang munsuh ni Tuhanta in
Puhoi pakon uhur nami on mangambilankon Jesus in tongtong

4. Antong buei baen Ham suruhan, na sai tongtong igoki Tonduy-Mu.
Janah na ringgas marambilan manogu halak hu gomgoman-Mu,
Taluhon Ham sibolis in tongtong ramoti hata-Mu i tanoh on .

19 Nopember: Manasap Salah ni Hasoman>>

<< 17 Nopember: Manasap Dousa ni Hasoman (2)