12 Nopember: Mandompakkon Sitaronon

“Laho patoguhkon uhur ni susian ai, anjaha mangojur sidea ase totap marhaporsayaon, nini sidea ma: Maningon bontasonta do buei sitaronon laho masuk hu bagas Harajaon ni Naibata”.

(Lahoan 14: 22)

Dompak halak Kristen do ihatahon Apostel Paulus hata in. Ihatahon ase totap haporsayaon bani Kristus. Ipagolpa do sidea pasal sitaronon, marhitei sitaronon ipasirsir sidea masuk hu Harajaon ni Naibata.

Songon halak na porsaya, ham pe isura-surahon ham do masuk hu Harajaon ni Naibata, i Nagoriatas, age pe lape misir ham laho masuk hujai. Songon anak ni Naibata do ham. Domma sasap dousamu.

Age pe sonai buei ope use dousamu tarlobih ibagas uhurmu. Marhitei sitaronon marlajar do hita mananggalhon dousanta, iguruhon hita do sabar ni uhur janah mangunduk bani Idop ni uhur ni Naibata. Sihol do hita gabe susian ni Tuhan Jesus. Pasal Tuhan Jesus tarsurat do: Ai age pe Anak Ia iguruhon do manangihon marhitei tinaronni (Heb. 5 : 8).

Sonaha manosal ope ham bani sitaronon nidageimu? Anggo la na so mardousa marlajar manangihon marhitei sitarononni samintolah ma hita pardousa on lang marlajar ma hita marhitei sitaronon?

Anggo isimbili uhurta sitaronon lalab ma lang iguruhon hita hasabaron na roh humbani sitaronon ai. Ingat ham ma Kristus do hasomanta ibagas parah ni sitarononta, songon nabi Daniel bani liang nisinga. Na dob tarlajou do Tuhanta bani bagei-bagei ni parlajoan, songon hita. Ra do Ia mangurupi hita.

Lambin rapat ma ham bani Naibata ibagas sitaronon. Kawahkon ham ma hamuliaon na paimahon ham i Nagoriatas. Ijai maluah ma ham humbani sitaronon. Dalan ni Naibata do sitaronon manirang uhurta hun dunia on, humbani uhur dunia on anjaha pasihol uhurta bani ianan na so dong be sitaronon atap pusok ni uhur, ai ma hasonangan ilambung ni Tuhanta i Nagoriatas.

Tonggo

Ham Tuhan Naibata! Urupi Ham ma ahu, is roh pe pusok ni uhur atap sitaronon bangku i tanoh on, sai manogu ahu ma ai hu Nagoriatas bani ianan hamuliaon in. Amen.

Doding

Haleluya No. 185: 4-6: I Surga Hasonangan In >>

4. Na parngit, na maniak pe, maronti ma ijin hape;
I surga seng be dousa le, maronti ma na jahat pe.

5. Na dong hasohan tanoh on, ai surga in do na tongtong;
Ai tanoh partangisan on, i surga sonang tonduyhin.

6. Halani ai, o tonduyhin pindahi na o surga in,
Podas ma roh mangalop ho Jesusmu, Sipagoluh ho.

13 Nopember: Dihut Pamantinhon Dunia On >>

<< 11 Nopember: Mangkawah Dompak Babou