27 Oktober: “Maluah ma ham humbani naboritmu in”

“Maluah ma ham inang humbani naboritmu in”!

(Lukas13 : 12)

Sanggah mangajari Tuhan Jesus bani parguruan, sanggah ari Sabbat, dong ma ijai sada naboru na dob sapuluhualuh tahun boritan (suhung, seng boi jojang), dong do na marulahi (setan). Dob ididah Jesus ia maidop ma uhurni, ihatahon ma hu bani: “Maluah ma ham inang humbani naboritmu”. Itampeihon Tuhan Jesus ma tanganni bani, mintor jojang ma ia pasangapkon Naibata.

Ra dong do iarou ham bani badan pakon tonduymu mambahen lang boi ham pasangapkon Naibata. Lang boi be ham martonggo, lang boi ham mandoding pasangap Naibata. Tuhan Jesus na maridop ni uhur bani puang-puang on, maidop do homa uhurni mangidah ham age sonari on. Ijia boi do ipaluah Jesus puang-puang ai humbani suhungni, ham pe boi do ipaluah Jesus humbani naboritmu, naborit ni angkula ampa naborit ni tonduymu. Dos do gogoh ni Tuhan Jesus na ijia ampa sonari, dos do homa idop ni uhurni.

Bani panorang on pe buei do na dob pinaluah ni Tuhan Jesus na dob martahun-tahun ibagas sitaronon na dob martahun-tahun seng boi be jojang ipintori ibahen dousa, ipamalum Tuhan Jesus gabe pintor ma langkahni, pintor ma goluhni. Dong deba sihol paluahonni dirini, tapi tong do mulak-mulak hubona, mulak tong bani dalan sapari ai.

Sasintongni seng tarpaluah hita dirinta, tapi maningon dong banta uhur na sihol maluah ai. Pindo hita ma pangurupi ni Tuhanta, urupan-Ni do hita, gabe malas ma uhurta dob ibogei hita hata na mantin ai: “Maluah ma ham humbani naboritmu. Tapi porini soh pe naboritmu bamu anggo ibere Tuhanta gogoh bamu manaron, roh hampungni ma naborit ai.

Tonggo

Ham Tuhan Jesus! Tarima kasih ma Bamu halani maidop do uhurmu bani na marsitaronon, tarlobih na marsitaronon halani dousa. Tarima kasih ma Bamu halani sirsir do Ham paluahkon hanami humbani dousa. Amen.

Doding

Haleluya No. 121 :1, 3, 4: Jesus Goluh ni Tonduyhu >>

1. Jesus goluhni Tonduyhu, ham do haporusankin.
Anggo tumpu bai tonduyhu bolis pakon setan in.

3. Bai musim ni haba-haba pinaroh ni musuhkin,
Togu au das hu labah bani parsaranan in.

4. Sai dingdingi Ham o Tuhan, au na sihol roh bamu.
Sa papodas pagoluhkon, se na ondos hu Bamu.

<<26 Oktober: “Ase Talar Horja ni Naibata Banta”

28 Oktober:”Sada Tanda Hamubahon ni Uhur”>>