4 Nopember: “… humbani idop ni uhur do sedo humbani horja”

“Anggo humbani idop ni uhur do sedo humbani horja: ambit sonai lang be idop ni uhur goranon”.

(Roma 11: 6)

(Terjemahan baru, 1976: “Tapi anggo humbani idop ni uhur, seng be humbani horja, ai ambit sonai, seng goranon be ai idop ni uhur” – Admin).

Na maluah do hita sedo halani horjanta, halani idop ni uhur ni Naibata do. Ai ma onjolan ni haporsayon na sasintongni. Ai ari-ari do hita manlanggar Titah ni Naibata, ija tarbahen pintor hita?

Porini bani panrimpunan niTitah ai gelah ipatudos hita uhurta: Holong do tong uhurmu dompak Naibata? Holong do tong uhurmu dompak hasoman jolma? Panlanggar do hita haganupan bani Titah holong ai, nape nagorani sada-sada Titah na nilanggarta. Ija ma tarbahen pintor hita humbani horjanta? Sintuhun seng boi!

Seng boi maluah hita halani horjanta, tapi marhitei horja ni Jesus Kristus banta. Ia do mangkopkop hita. Manaron hamatean Ia halani dousanta janah puho Ia ase gabe pintor hita. Marhitei Kristus mardamei hita pakon Naibata. Marhitei haporsayaon bani Jesus Kristus mardamei hita pakon Naibata. Marhitei haporsajaon bani Jesus Kristus, das hu banta idop ni uhur ni Naibata. Marhitei haporsayaon bani Kristus do marpangarapan hita bani goluh magira.

Titah pakon hata ni Naibata do na patidak dousanta banta ibahen Tonduy na Pansing. Halani ibotoh sibolis ai, sai ilanglangi do hita mambasa hata ni Naibata, ulang pongkut hita mambasa hata ni Naibata, ulang pongkut hita marhorja banggal na pansing, bahenonni do ulang tenger uhurta bani idop ni uhur ni Naibata.

Halani ai poltik ma jolom hita idop ni uhur ni Naibata na marhitei Jesus Kristus. Pindoonta ma Tonduy na Pansing ase ipamalas uhurta janah ipatoguh haporsayaonta bani idop ni uhur ni Naibata.

Bani sagala ugama na i tanoh on, sai dong do ipindo horja pakon jasa mangombou goluh magira ai. Ai ma hasurungan ni Kristen, Tuhan Jesus do managang parombouta. Ia do pasirsirhon hasasapan ni dousa pakon hapintoron, mangkaporsayai mando hita isuruh.

Tonggo

Tarima kasih ma Bamu Naibata, halani ibahen Ham haluahonnami ibagas Jesus Kristus. urupi Ham ma hanami ase ulang das dong na mangunsagahon horjani ilobeiMu. Amen.

Doding

Haleluya No. 133 : 1, 5, 12: Holong do Atei >>

1.Holong do atei ni Naibatangku
parholong atei mangidah au.
Ai ipasirsir do haluahonku
marhitei Jesus Anak-Ni in.

5.Itaron Jesus do hamateian,
manggalar utang ni dousangkin.
Ai do ‘se ningku tong:
Holong do atei ni Naibatangku mangidah au.

12.Sai pujionku do uhur holong,
ni tinuduhkonni Naibata.
Ai do ‘se ningku tong:
Holong do atei ni Naibatangku mangidah au.

5 Nopember: “Tongtong ma mangkatahon tarima kasih pasal haganup”>>

<< 3 Nopember: Mangindahi Mutiha na Maharga