10 Juli: “Ai isarihon do nasiam”

“Patoruh nasiam ma diri nasiam hutoruh ni tangan ni Naibata na gogoh in, ase ipagijang nasiam bani panorangni. Ompaskon nasiam ma sagala hinolsohkon ni uhur nasiam hu Bani, ai isarihon do nasiam.”

(1 Petrus 5: 6, 7)

Dong do panorang iompaskon Naibata tangan-Ni na gogoh ai banta, ai ma anggo roh naborit, matean atap gogoh seda ekonomi. Ra do homa ingat dua tolu pahara, sahali roh banta. Jadi roh ma parlajoan banta, roh ma uhurta mangkatahon: “Seng be gakni holong uhur ni Bapa na i nagoriatas (Naibata) ai bangku. Lang gakni ididah sitarononkon, sonin parahni, ra seng tahan be ahu dokah manaron on”. Ra do homa roh sora hubagas uhurta mangkatahon: “Ulang sonai pingkiranmu. Patoruh ma uhurmu hu toruh ni tangan ni Naibata na gogoh in. Sedo na Iupa Ia bamu. Manrogop ma ham hu lobei-Ni mangkatahon: “Ham Bapa na i nagoriatas, ibotoh Ham do aha na dear bangku, huondoskon ma Bamu sagala na sinarihon ni uhurMu”!

Dob ai patugah ham ma jojor sagala pusok ni uhurmu ai bani Bapanta ai, sitarononmu pakon sagala na mahol ibagas uhurmu, isarihon do ham. Pungkah ham ma marpingkir rapkon Naibata. Jadi margoling ma sitarononmu gabe malas ni uhur. Hatahon ham ma bani tonduymu: “Gantarhu do Naibata, isarihon do ahu.”

Na madear do Naibata. Buei do na dob mangahap ibuat Naibata do pusok ni uhur ai. Iahap Naibata do mansarihonsi age ibagas sitaronon Ia. Jadi ham pe ondoskon ham ma sinarihon ni uhurmu Bani, ai isarihon do ham. Na porlu banta, na mangompaskon ai hu lobei ni Naibata, sagala na hinolsohkon ni uhurta. Artini, bulat marondos bani Naibata. Boi do ai anggo ihahap hita humbani tongon ni uhurta isarihon Nabata do hita.

Tonggo

Ham Tuhan Naibata! Bahen Ham ma ase tongtong hudingat na isarihon Ham do ahu, seng ongga ihalupahon Ham ahu, hanami sagala na dob tinobus-Mu. Marhitei Tuhan Jesus Kristus.

Amen.

Haleluya No 152: 3, 5: Na Sonang Au Dob Na Mar Tuhan au >>

3. Sonang ma au! Bujur do Bapangkin na mansarihon au.
janah layak; ganup na porlu ibere do tong au.
Parbegu do na mangkolsohkon goluhni pakon sipanganon.
Au sonang do! Au sonang do!

5. Sonang ma au, anggo marsaran au, bai abingan-Ni in.
Na parngit in ‘tor itadingkon au, dob ondos au hujin.
Nuan na porlu bai uhurhu: Sai surga in ma bongkotanku.
Martuah au! Martuah au!