5 Juli: Songon Anak na Magou

“Misir ma lah ahu laho bani Bapa, hataonkonku ma hu bani: Bapa, domma mardousa ahu hu nagoriatas pakon dompak ham. Jadi misir ma ia mangayaki bapani.”

(Lukas 15 : 18, 20)

Idingat ham do barita ni anak na magou ondi. Seng marosuh ia soh i rumah ni bapani. Seng marosuh ia mambalosi. Ihatahon ibagas uhurni: Humbani sonari hudalankon ma harosuh ni uhurhu. Misir ma ia anjaha isuhuni ma rosuhni ibagas goluhni, iparbois-bois ma artani. Dobni marsik ma goluhni narus matei ma.

Dob sonai pangandunganni, ijai ma iluarhon hata na iatas in. Saud ma misir ia dompak rumah ni bapani.

Buei do anak atap boru na songon anak na magou. Domma Iobei gabe anak ni Naibata ia janah manggoluh ibagas malas ni uhur. Tapi roh ma na jahat na manlajousi: “Dearan ma ahu misir ase hubahen uhur-uhurhu bani dunia na lumbang on”. Lupa ma ia manombah Naibata. Manggoluh ma ia mangihutkon pangindoan ni angkulani. Bois ma arta partonduyonni. Magou ma homa damei hunbagas uhurni, magou ma haanakon bani Naibata. Itadingkon ma Naibata janah lupa ma ia bani pandidionni pakon padan ijai, lang be dong malas ni uhurni.

Tapi Naibata seng ongga lupa bani anak-Ni na dob iain ibagas pandidion na pansing in. Tapi roh do nanget-nanget Tonduyni Naibata bani anak na magou ai, mangojursi ase mulak hu rumah ni Bapani. Sirsir do Bapani manjalosi pakon mangkaholongisi.

Bani panorang na sonai ai ma roh uhur ni anak ai mangkatahon: “Domma mardousa ahu dompak Naibata, tapi hubotoh ra do Naibata manasap dousangku janah manjalo ahu gabe niombah-Ni use. Tontu malas uhurhu mambalosi use ronsi mandalankon titah-Ni use ampa pasangapkon-Si.”

Sada do na harga bani barita ni anak na magou ai, ai ma haputusanni mulak bani bapani, janah idalankon.

Ai ma na porlu bani ganup hita, putus ni uhurta, sihol mulak bai Naibata. Harga do hita bani Naibata.

Tonggo

Ham Tuhan Naibata! Holong do tong uhur-Mu bannami. Seng ongga lupa Ham bannami. Tarima kasih ma Bamu halani idop ni uhur-Mu ai pakon holong ni atei-Mu. Urupi Ham ma hanami ase tong mulak hanami hu Bamu.

Amen.

Doding

Haleluya No 111: 1-3: Sai Mulak Sai Mulak >>

1. Sai mulak, sai mulak na mardagang do ho!
Ai daoh ho nuan, sirang do tuah min.
O pardagang ou! Mulak! Mulak ma ho!
Mulak! Mulak ma ho!

2. Sai mulak, sai mulak, na sininta dokah!
Sai datei uhurmu, ai buei dousamu.
O pardagang ou! Mulak! Mulak ma ho!
Mulak! Mulak ma ho!

3. Sai mulak, sai mulak, ho hun siou nadaoh!
Hadoyuokon do in, dageionmu ijin.
O pardagang ou! Mulak! Mulak ma ho!
Mulak! Mulak ma ho