Songon anak na niipuk ni inangni, sonai do ipukon-Ku hanima.
(Jesaya 66 :13)
Terjemahan baru (1973, LAI), “Songon halak na niapoh ni inangni, sonai do apohonku hanima.”
Seng naarusi bagasni, ai seng dong pangapoh siataskon ni pangapoh ni inang, bani anakni. Dob boritan sada dakdanak, dob tibal bani abingan ni inangni, ituri-turihon pangahapni bani inangni, tarbogei ma hata na lamlam mangapoh dakdanak in, taridah ma bohi na tarapoh bani dakdanak ai. Age anak na so mamhalosi namatorasni atap anak sibahen pusok ni uhur ni inangni, tapi mulak honsi hu rumah, ibogei hata ni inangni mintor tarapoh do uhurni. “O anakku sonaha do pangahapmu dob ganggang humbangku”? Lupa do ia bani pusok ni uhurni pambahen ni dakdanak ai. Tapi ibahen do sagala dalan ase marmalas ni uhur use dakdanak ai.
Songon inang na mangapoh anakni sonai do iapoh Naibata hita bani pusok ni uhurta.
Ongga ma iahap ham, iapoh Naibata ham? Sanggah pusok uhurmu atap sanggah boritan ham? Ingat ham ma domma ijalo Naibata ham gabe niombahni bani pandidion na pansing ai. Hape lupa ham bani padan pakon pangakuanmu. Ganggang ham humbani Naibata, mardousa ham. Tapi botoh ham ma, maidop do uhur ni Naibata mangidah ham, marontou do uhur-Ni, songon sada inang dompak niombahni.
Anggo sahalak pardousa roh bani Naibata mamboan dousani pakon pusok ni uhurni anjaha masihol bani holong ni atei ni Naibata, Bapa na i nagoriatas ai. Tenger ma uhurmu, roh ma ham ijalo Naibata do ham, isasap sagala dousamu, gabe malas ma uhurmu, megah ma ham.
Anggo sonai hape, lang patut be hita soh ibagas dousa, roh ma hita bani Bapanta na i nagoriatas ai.
Tonggo
Ham Bapa, domma mardousa ahu dompak Ham pakon dompak hasoman jolma. Bapangku do Ham anakmu do ahu. Sasap Ham ma dousangku. Pabayu Ham ma uhurhu.
Amen.
Doding
Haleluya 154: 3,4 Marsipota pe Idahon >>
3. Songon pambere ni Bapa do pambere ni Tuhanta,
na marguna dansa tong iberehon banta on.
4. Tenger uhur bai Bapangku naha pe hasosakan ku,
sai holong atei-Ni in dompak au anak-Ni in.
Recent Comments