19 Maret: Mangkaporsayai Banggal ni Holong ni Naibata banta

Jadi anggo tarkahua Ham, holong ma ateimu tolong Ham ma hanami.
Terjemahan baru (LAI 1973) “Tapi anggo dong do kuasamu, holong ma uhurmu, urupi Ham ma hanami”.

(Markus 9: 22b)

Iboan sada bapa ma anakni bani Jesus. Domma ibogei na dob buei ipamalum Tuhan Jesus na boritan. Tapi seng ope dong ibotoh na songon parah ni naboritni anakni ai, ai do ase sonai panluarni: “Jadi anggo tarkahua Ham holong ma ateimu tolong Ham ma hanami!”

Hira uhur riap do ai sangsi bani partolongan ni Tuhan Jesus ai do ase lang ijalo halak partolongan ni Tuhan Jesus ibagas hasunsahanni. Ibotoh halak ijalo Tuhan Jesus do pardousa. Dong do kuasani manjalo pardousa ibagas idop ni uhurni. Sonai ma ipindo uhurni bahenon ni Tuhan Jesus bani anakni na boritan ai, tapi sangsi ia atap boi ipamalum Tuhan Jesus sonai parahni.

Tapi ham ulang be sangsi bani partolongan ni Tuhan Jesus. Tuk do gogohni janah ra do Ia paluahkon ham humbani dousamu. Tapi ningon atok uhurmu, ningon porsaya botul hita.

Ibotoh ham pe banggal dousamu, banggalan ope ai ididah Naibata na Pansing in, tapi daoh banggalan ope idop ni uhur ni Naibata marhitei Tuhan Jesus. Ai domma manaron na marsik Tuhan Jesus pala matei tarsilang mangkopkop hita pardousa, laho paluahkon hita pardousa banggal on, hita jolma manisia ganupan. Haporsayai ham ma ai humbani bulat ni uhurmu.

Basal ham ma pasal paruntolon ni Tuhan Jesus i Getsemane torus ronsi das bani na iparsilangkon, sonaha banggal ni paruntolonni laho pasirsirhon haluahon banta.

Pindoonta do Tonduy na Pansing ase ai patorangkon banta banggal ni ni holongni ai marhitei Tuhan Jesus Kristus.

Tonggo

Ham Tuhan Jesus! Urupi Ham ma hanami ase iahap janah ihaporsayai hanami banggal ni holong ni ateimu, marhitei sitaronon ronsi parmateimu pasirsirhon haluahon bannami pardousa on.

Amen.

Doding

Haleluya No. 62: 2, 4 Jesus Ham do Bah Tubuhku >>

2. Habileion, apas-apas, lansat ampa tijur pe.
Tali pakon tompa-tompas itaronkon Ham hape.
Paluahkon au na sombuh humbai tangan ni sibolis.
Halanin hupuji Ham sai marribu hali tong.

4. Ranting duri igotongkon bani simanjujung-Mu.
Janah tolong ilipatkon lao pamarsik ulu-Mu.
In itaron Ham Tuhanku marhalahon ni dousangku.
Halanin hupuji Ham sai marribu hali tong.

20 Maret: Maningon narotapi do tenger ni uhur bani na legan >>

<< 18 Maret: Sonaha, otik do holong ni uhurmu bani Jesus?