“Maridi ma ho ase borsih!”
(2 Raja 5:13b)
Na gadamon do si Naeman komandan ni tentera ni raja Siria. Ibogei do barita ni nabi Elisa, marhitei gogoh ni Naibata gan boi do ipamalum na gadamon. Jadi laho ma ia bani nabi Israel ai. Roh ma ia marhuda rap pakon gareta porangni ampa odoranni hu rumah ni nabi Elisa. Ihatahon nabi Elisa ma hata on: “Laho ma ho maridi hu bah Jordan pitu hali, jadi suang ma angkulamu janah malum gadammu. Jadi manggila ma si Naeman janah misir. Jadi roh ma juak-juakni marsahap bani sonon: Porini ihatahon nabi ai atap aha tagangonmu, ai lang itagang ham do? Samintolah ma on: Maridi do, dob ai borsih ma? Dob ai turun ma ia janah maridi hu bah Jordan songon hinatahon ni juak-juak ni Naibata. Jadi gabe dear ma badanni songon badanni songon badan ni dakdanak, gabe borsih ma ia.
Sonai do homa parmalum ni gadam dousa ai: “Maridi ma dob ai borsih ma”. Na paborsihkon dousanta ai ma daroh ni Tuhanta Jesus. Hata ni Naibata mangkatahon: Anggo isopotkon hita dousanta hatengeran ni uhur do Ia janah bonar manasap dousanta pakon papansingkon hita humbani ganup hagedukon in.
Atap seng homa siat hu bagas uhurmu ai songon komandan Siria ai? Jadiatei ma siat do use hata ni juak-juakni gabe ibalosi. Haporsayai ham ma daroh ni Tuhanta Jesus ijai do mamurihi hita humbani dousa ganupan. On do hansa pulunganni. Sopotkon ham dousamu humbani tongon ni uhurmu janah pindo ham hasasapanni. Hatengeran ni uhur do Naibata na manasap ganup dousangku marhitei daroh ni Tuhan Jesus Sipaluah ahu.
Tonggo
Ham Tuhan Naibata, Bapanami na i nagoriatas! Urupi Ham ahu ari-ari mananda dousangku pakon mansopotkon ai hu Bamu, ase borsih ahu ilobeimu.
Amen.
Doding
Haleluya No. 147: 3, 4. Ham Naibata Banggal Tumang >>
3. On pe Bamu naman au roh, sai ulang tulak ahu;
Pahombun Ham, O Naibata, panringis-Mu hu bangku.
4. Ai daroh-Mu na harga in, Jesus baen pardearan;
Sahei ijin do utangkin bai hayu na marsilang,
Recent Comments