“Anggo dong na horahan hu Bangku ma ia roh minum”.
(Johannes 7: 37)
Ra ihatahon ham: Ahu horahan do, ahu horahan do sihol mardamei pakon Naibata. Dousangku do na mambahen pusok ni uhurhu. Irajai dousangku do ahu, seng ra sirang humbangku. Horahan do ahu. Jadi seng dong hasonangan, seng dong damei ibagas uhurhu. Hudingat do tong dousangku. Domma marutang dousa ahu.
Domma ibalosi ham hata ni Tuhan Jesus? Ai nini: “Hu Bangku ma ia roh minum”. Domma margoling ham dompak Jesus mangkatahon: Andon ma ahu Tuhan na margulu ibagas dousa. Rusak do ahu ibahen dousangku. Bulinsah do uhurhu, sihol do ahu mardamei, sihol sirang do ahu humbani dousangku. Ham Tuhan Jesus maidop ma Ham mangidah ahu. Pasonang Ham ma uhurhu na sunsah on. Paborsih Ham ma uhurhu pakon goluhku!
Sonaha, domma ituri-turihon ham sonai bani Tuhan Jesus? Atap daoh do hansa Ham gabe seng sombuh horahmu. “Hu Bangku ma roh ia minum” nini Tuhan Jesus. Tapi anggo daoh do ham, sonaha panolong-Ni ham?
Botoh ham ma na horahan do tonduymu. Ra do ham mangihutkon hata ni Tuhan Jesus? Gabe masombuh do Ia ase bayak ham. Ai pe roh ma ham hu Bani mamorsan dousamu ampa panlanggaronmu. Patugah ham hu Bani ganup pasal dousamu, marhitei ugahni do malum iahap ham. Anggo sonai sombuh ma horahmu. Pusok ni uhurmu marubah gabe malas ni uhurmu. Pujionmu ma Naibata halani idop uhumi.
Sapari anggo siar (huhuta) tonduy ni halak, sai tangis do, ai dayok mirah do bereanni, rudang pakon sunting ampa tintin do bereanni nabahen (materi), seng tudu berean ni tonduyta ai, ai tonduy do ia jadi partonduyon do bereansi. Tuhan Jesus do berean ni tonduyta. Anggo pajumpah Tuhan Jesus pakon tonduyta, anggo pajumpah tonduyta pakon Tuhan Jesus, malas ma uhurta, tudu ma bereansi, mardamei ma hita pakon Naibata, sonang ma uhurta.
Tonggo
Ham Tuhan Jesus! Roh do hanami hu Bamu, ipindahi hanami do Bapa in, ibotoh hanami Ham do padamei hanami pakon Naibata, Ham do padomu hanami pakon Bapa in. Bahen Ham ma marmalas uhur hanami ibagas Ham.
Amen.
Doding
Haleluya No. 152 : 1, 2, 5: Na Sonang Au Dob na Mar Tuhan Au >>
1. Na sonang au dob na mar Tuhan au bai Tuhan Jesus in.
Ai lang be dong dob jabolon-Ni au sihoruonkonkin.
Ai Ia mado huirikkon, dunia on ma hutundalhon,
Sonang ma au! Sonang ma au!
2. Sonang ma au, ai mambur do hape pusokni uhurhin.
Megah ma au ronsi antigan pe iapoh Jesuskin.
Seng huhoruhon be goluhku, ganup do guru bai Bapangku.
Seng ma au! Sonang ma au!
5. Sonang ma au, anggo marsaran au, bai abingan-Ni in.
Na parngit in ‘tor itadingkon au, dob ondos au hujin.
Nuan na porlu bai uhurhu: Sai surga in ma bongkotanku.
Martuah au! Martuah au!
Recent Comments