“Bani ari parpudi ni pesta in, tang matani, jongjong ma Jesus ijin ipamaling ma sorani mangkatahon: anggo dong na horahan hu Bangku ma ia roh minum”.
(Johannes 7 : 37)
Bani pesta lampo-lampo ni halak Israel, ibahen sidea do pardingatan. Ibahen do sipauman ni pasal na porlu ingaton ibagas pardalanan ni sidea na bungkas hun Masir hu tanoh Kanaan. Umpamani na horahan pakon bah na marburak-burak ibere Naibata ipauman sidea. Bani panorang na paumankon bah ai ma iluarhon Tuhan Jesus ayat na iatas in: “Barang ise na horahan, hu-Bangku ma ia roh minum”. (Padan Na Baru, Revisi)
Songon limbaga do ai ihatahon Tuhanta. Sedo siinumon (bah) na somal hinatahonni ijai. Tapi horahan, uhur na so ra sonang do.
Songon na horah-horahan do jolma i tanoh on. Bayak jajat na hurang bayak, sangap jajat na hurang sangap, pentar jajat na hurang pentar. Seng ra sonang, tong horah-horahan. Tapi ulang ham lupa uhur na marhurangnari ai pe humbani Naibata do ai, ase ipindahi halak sisonangan, ai ma hasonangan magira.
Lepak ni jolma mangindahi na sonang ai, hulambung isari bani habayakon, hapentaran, hasangapon na pakon nalegan, na i tanoh on, namin maningon hu babou do hubani Naibata. Ai ma tujuan ni Tuhanta ase ihatahon hata ai.
Dihut do bamu ihatahon hata ai. Anggo ididah ham sedo na boi sonang ham ibahen na i tanoh on, roh ma ham bani Tuhan Jesus. Ai seng tarbahen sonang jolma paima mulak bani Naibata hasusuranni hinan. Anggo roh hita hubani Tuhan Jesus, Ia ma hiteita mulak huhani Naibata. Ijai ma ham bayak, ijai ma ham pentar, ijai ma ham sangap, ijai ma sombuh horah ni tonduymu, ijai ma ham ompung ni sinarimu, seng irajai pansarian be ham, ham ma manrajai pansarian ai. Masombuh atap bayak pe ham bani arta tanoh on, dorun atap sangap, bodoh atap pentar ham sonang ma uhurmu. Bani Tuhan Jesus ma sombuh horah ni tonduymu. Na horahan do tonduyta, halani ai roh ma hita bani Tuhan Jesus, ase sombuh horah ni tonduyta.
Tonggo
Ham Tuhan Jesus! Tarima kasih ma Bamu, halani Ham do sipasombuh horah hun tanoh on das hu nagoriatas.
Amen.
Doding
Haleluya No. 150 :1-3: Lauja do Ho na Loja in >>
1. Lauja do ho, naloja in, binaen ni dousamin?
Seng jumpah ho na sonang in, i parlajanganmin
halani in, sai mulak ho!
2. Ompaskon pusok uhurmin bai Tuhan Jesus in.
Sai boban ganup dousamin bai Sipagoluh in.
Nai ma tongon, sai roh ma ho!
3. Ai Jesus do padamei ho na loja in tongtong;
Ai anggo lang hujin ho roh, manaron ma ho tong.
Halani in, sai roh ma ho.
tnt160517
Recent Comments