14 Mei: “Ulang ma Tonjan Uhurnima! (2)

“Ulang ma tonjan uhurnima! Porsaya ma hanima bani Naibata, anjaha porsaya ma homa Bangku”!

(Johannes 14 : 1)

Malele sitaronon-Ni pakon parmatei-Ni do iluarhon Tuhan Jesus hata ai bani susian-Ni. Ibotoh do na laho manaron do Ia jaha marpusok ni uhur, hira na matei do, sonai nini i pohon Getsemane.

Tapi sedo ai na parlobei ipingkiri dob manaron holi Ia janah matei, dob sirang sidea. Laho patogar uhur ni sidea do iluarhon hata ai. Bani masani ai holi ulang galek uhumi, ulang, mandolei, ulang tonjan.

Hunjin ma homa taridah holong ni uhur ni Tuhan Jesus bani susian-Ni, bani huan-Ni. Ai ibotoh na parah do holi pusok ni uhur sidea dob lang be rap pakon Tuhan Jesus. Pargogoh ni sidea ma hata ai dob dapot holi panorangni.

Totap do holong ni uhur ni Tuhan Jesus bani ganup susian-Ni. Songon na lupa do Ia mardingat na laho taronon-Ni, tapi idingat do na laho taronon ni susian-Ni, halani holong ni atei-Ni bani sidea.

Sonai do holong ni Tuhanta age dompak hita, iahap uhur-Ni do sonaha pusok ni uhurta. Ihatahon homa banta: “Ulang tonjan uhurnima. Porsaya ma bani Naibata jaha porsaya ma pakon Bangku!”

Sai ingatonta ma hata in ibagas pusok ni uhurta atap pusok ni uhur pasal aha pe: “Manggoluh do Naibata, manggoluh do Tuhan Jesus, holong do uhur-Ni bani susian-Ni, ahu pe idingat do!” “Ra do Ia mangurupi ahu!” Dear do naulak-ulak mangkatahon sonai, ase lambin totap hita bani Naibata.

Uhur na tonjan, uhur na jut, uhur na pulnong, seng dong be lapang na randang naidah. Anggo randang uhurta dompak Naibata, iparandang ai do dalan ni pingkiranta. Ai tenger ni uhurta bani Naibata ai ma pajulurhon uhurta age pasal na i tanoh on. Ase anggo jut uhurta, tonjan hita, ingat hita ma Naibata ase randang use haganupan.

Tonggo

Ham Tuhan Jesus! Idingat hanami do bagah-bagah-Mu ai dompak susian-Mu. Urupi Ham ma hanami ase totap porsaya hanami bani Bapa in pakon Bamu sandiri, ulang tonjan uhurnami.

Amen.

Doding

Haleluya No. 113 :1.3: 1. Asal rap ampakon Tuhan Jesus au >>

1. Asal rap ampakon Tuhan Jesus au.
Sadokahni mangiankon tanoh hasusahan au.
Sonang do uhurhu, ai hubotoh Jesus hasomanku.

3.Sonang do uhurhu rapkon Jesus in.
Ai isasap do dousangku, ipatorang langkahkin.
Ase ulang magou tonduyhin bahenon ni pangagou.