8 Mei: Mangihutkon Bokas ni Nahei-Ni

tnt_mei8_holongnijesus.jpg

“….ase iirikkon nasiam bokas ni nahei-Ni.”

(1 Petrus 2: 21)

Kristus domma manaron na marsik halani dousanta. Manadingkon usihan do Ia banta, ase iihutkon hita bokas ni nahei-Ni. Sihol songon-Si ma namin hita i dunia on. Seng dong dousa Bani, seng dong ladung bani pamangan-Ni, seng mambalas Ia, iondoskon do ganup bani Panguhum na sintong in.

Anggo sihol hita gabe susian ni Tuhan Jesus, ningon usihanta Ia, ihutkon hita bokas ni nahei-Ni. Artini ai maningon ari-ari do hita manlawan dousa pakon parlajoan. Halani ai ningon jaga do hita janah martonggo, ase ulang hita hona parlajoan ai. Ia Tuhan Jesus sadokah i tanoh on Ia, roh pe hata jungkat hu Bani, lamlam do ibalosi. Ganupan ai sihol usihanta.

Tapi tang sibanggalan siusihanta, ai ma holong ni atei ni Tuhan Jesus bani na lohean, na masombuh, na loja janah na boratan, na boritan, na pusokan uhur. Anggo ipatudos hita pingkiranta hubani holong ni uhur ni Tuhan Jesus, daoh do hita tading, daoh do hita i pudi, songon na so taririkkon hita do bokas ni nahei ni Tuhan Jesus.

Na porlu ijai, anggo iahap hita ma holong ni uhur ni Tuhan Jesus banta, na sonai banggalni, ai do patubuh holong banta dompak Tuhanta ampa dompak hasoman jolma.

Sai monang do holong i tanoh on. Holong ma sada bokas ni Tuhan Jesus sibanggalan siihutonkon ni hita susian ni Tuhan Jesus (Kristen).

Sonai do homa ronsi hasabaron ni Tuhan Jesus manaron sitaronon: Lang patut hape hita Kristen pargila-gila, ningon sabar do hita songon Tuhanta Jesus mangihutkon bokas ni naheini. Ai Tuhanta Jesus iparlahouhon do podahni, ipodahkon do parlahouni. Dos do hatani pakon pambahenanni. Anggo hita sai ganjangan do hatanta ase pambahenanta. Siparlajaranta ma ai.

Tonggo

Ham Tuhan Jesus. Paruhuri janah pargogohi Ham ma hanami ase boi iirik-irik hanami bokas-Mu na pansing in, das hu hagoluhan na sadokah ni dokahni.

Amen.

Doding

Haleluya No. 118: 1 – 2: Tuhan Jesus Siparmahan >>

1. Tuhan Jesus Siparmahan ganup biri-biri do.
Jesus gok Bamu uhurhu, sai irikkononku Ham
Sai irikkononku Ham, sai irikkononku Ham.
Jesus gok Bamu uhurhu, sai irikkononku Ham.

2. Bai musimni sipangagou, Ham panjaga na gogoh.
Anggo bokas-Mu hu tonggor, sai irikkononku Ham,
Sai irikkononku Ham, sai irikkononku Ham.
Anggo bokas-Mu hutonggor, sai irikkononku Ham.

Haleluya No. 118: 1 – 2