“Halani ai bere Ham ma bani juak-juakmu on uhur na pantas laho manguhumi bangsamu, ase hubotoh manirang na madear humbani na masambor“.
(1 Raja 3: 9)
Ia na jahat roh hu banta marpahean na madear, mahol do banta mananda naija na dear, naija na sambor. Gati do age hata, dear ma ninuhur hape sambor pangonaini. Mahol do diri mamareksa hata pakon uhur diri sandiri, naija na dear naija na sambor.
Anggo domma buei na jahat marianan ibagas uhur ni jolma lambin mahol ma mananda naija na dear naija na sambor bani halak. Halani ai maningon pingkiran na roh humbani Naibata mando patorsahon uhurta. Halani ai mangindo ma hita homa bani Naibata, songon Raja Suleman, ase ibere Naibata uhur na pantas, uhur na sintong, uhur na pintor mangarusi na sintong pakon na pelet.
Na lobih mahol ope mamilih horja diri, dear ma nini uhur hape sambor do, sonai age sahap diri. Pangkorhon ni ai parah do. Ase uhur do siatasan marimbang haganupan, ai uhur ai do mandur ni hita, mandur ni parlahou. Anggo domma sintong uhur ai, sintong ma hita, sintong ma parlahouta.
Halani ai uhurta ma bere hita itopa Naibata itopa hata ni Naibata, itopa Tonduy ni Naibata, ase gabe pantas, marot mangarusi naija na dear naija nu sambor. Tonggo na songon tonggo ni Raja Suleman ai, ai ma tonggo na hinarosuhkon ni Naibata, janah ra do Naibata mambalosi.
Patut do gati lang das janah lang ibalosi Naibata tonggonta, ai pangindoanta pe seng ongga uman iahap Naibata. Marguru ma hita humbani raja na porsaya on. Uhur na pantas do ipindo, ase ibotoh mambahen timbangan na sintong. Jadi saud do ibere Naibata.
Tonggo
Ham Tuhan Naibata, Bapanami na i nagoriatas! Gati tumang do Tuhan seng ibotoh hanami manirang na dear humbani na sambor. Bere Ham ma bannami pangartian pasal ai, ase torang ididah hanami harosuhmu sibahenonnami ampa hagigimu sisimbilannami.
Amen.
Doding
Haleluya No. 83: 1,2: Roh ma Ham Tonduy Na Pansing >>
1. Roh ma Ham Tonduy na Pansing, Naibatangku na botul,
Uhurnami ma papansing, mambalosi Ham bujur.
Sai sondangi Ham totap uhurnami na golap.
2. Bere Ham bai uhurnami hapentaran hun Bamu.
Ase ibotoh hanami marpangabak hu Bamu;
Humbai hakahouon pe Ham ma paluahkon bei.
Recent Comments