Tuhan, sonangni ai huahap ijon. Anggo dear nimu ase hubahen tolu barung-barung, sada Bamu, sada bani si Musa, sada bani si Elias. Jadi dob mangkawah sidea, ise pe lang be ijin, sahalak Jesus mando.
(Mat. 17: 4, 8)
(Terjemahan baru: “Jadi iparsahapkon si Petrus ma Jesus, nini ma: Sonang ni in ijon! Anggo marosuh Ham, hupauli ma ijon tolu lampo-lampo, sada Bamu, sada bani si Musa, anjaha na sada nari bani si Elias. Tapi sanggah mangkawah sidea, seng dong atap ise iidah sidea ijai sobali Jesus tumang”.)
Iatas dolog hasangapon ni Tuhan Jesus, songon na iahap si Petrus do sabagian ni surga. Dong niidahni, dong niahapni. Gabe ihatahon ma hata ni ayat na iatas in: “Sonangni ai huahap ijon”. Sihol sonai namin torus ni uhurni, ai do ase ihatahon bahenonni barung-barung ijai. Ase ijai tong si Musa, si Elias rap pakon Tuhan Jesus, ase sonang iahap sidea, masuk ibagas hamuliaon ni Naibata. Tapi seng marosuh Ia lanjar i tanoh on hansa susian ni Tuhan Jesus. Nagoriatas do itontuhon Naibata ianan hasonangan.
Ipaulgap do otik hamuliaon ni Naibata, ipaahapkon sonangni, ase masihol jolma hujai. “Ai pe ulang ambukkon nasiam hinsah ni uhur nasiam, ai banggal do upahni ai” (Heb. 10 35).
Martorap iahap halak na porsaya do hamuliaon ni Naibata, dohor ia iahap hujai, igoki damei na humbabou ai do uhurni. Iahap do holong ni atei ni Naibata hu banta, songon na itangan-tangan Naibata do ia iahap, sonang uhurni.
Tapi panorang sisonai ai salpu do use. Roh ma use paruntolon na marbagei-bagei hu banta. Lupa do hita na dob anak ni Naibata hita?
Ingat ma seng na maluah hita age ibahen aha pe. Tapi boi hita maluah bahenon ni Tuhan Jesus Sipaluah ai. Ingat hita ma hata on: “Domma sungkup bam idop ni uhurhu, ai kuasangku das do ibagas hagalekon” (2 Kor. 12: 9).
Ibagas sihol ni uhur mardingat hasonangan ai, hamuliaon ai, ai ma mangojur hita maruntol sadokah manggoluh hita, ase das hita hu hamuliaon ni Naibatanta.
Tonggo
Ham Tuhan Jesus, paulgap Ham ma hamuliaon-Mu bangku, marhitei Tonduymu, ase sihol uhurhu mangindahi hun tanoh on nari das hu nagoriatas.
Amen.
Doding
Haleluya No. 170 : 1, 2. Sai Nagori Atas Do >>
1. Sai nagori atas do situjuaon ni uhurta;
Ai na manginsolat do hita i nagori tongah.
Pardagangan tanoh on, surga hasusuranta in.
2. O tonduyhu, tatap ma, surga in, hasusuranmu.
Tanoh on tundalhon ma seng talup in iananmu.
Surga do tujuan ni na torang maruhur in.
17 Februari: Tungguon ni Naibata do Talenta Binereni Banta >>
Recent Comments