Ingat ma ari Sabbat laho manrobuhonsi.
(2 Musa 20 :8)
Ia ari Sabbat sibere-bere ni Naibata do ai bani pamatang pakon tonduyta ase gabe pasu-pasu. Pakei hita ma ari ai gabe pasu-pasu bani goluhta sonari ampa goluhta use.
Mase gabe ari Minggu ibosarhon halak Kristen, lang be ari Sabbat songon bani Padan na Basaia? Ari Minggu ai ma ari parpuho Tuhan Jesus, ai ma na ginoran ari ni Tuhan. Ari Minggu do puho Tuhan Jesus humbani tanomanni, arianni ai (Minggu ai) do ipatidak dirini bani susianni, lang dihut si Tomas, ari Minggu homa ipatidak dirini dihut bani si Tomas.
Pandapot ni Kristen mula-mula: Malas do uhur ni Tuhan Jesus patidak dirini bani Kristen sanggah ari Minggu, ai ma ari parpuho-Ni ai humbani na matei. Hira pesta pardingatan bani parpuho ni Tuhanta do ari Minggu ai. Kristen Jahudi dong deba martumpu bani ari Minggu dob salpu ari Sabbat, tapi Kristen na roh humbani sipajuh begu-begu mintor ari Minggu do hansa ipakei. Ase Kristen mula-mula mintor ari Minggu ai do parsaranan ni sidea. Domma mamungkah hasomalan ai humbani kuria sanggah Apostel Paulus, sonai homa i pudini ni bapa-bapa ni kuria (Ignatius 115; Justinus Martyr 165; Tertullianus 220; Clemens 220). Ipudi ni ari itotapkon Pamarentah ma use ari Minggu ari parsaranan ibagas gomgoman Roma.
Sonaha do pamakeita bani ari Minggu ai ase marpasu-pasu? Humbani bodari ni ari Saptu pasomal hita mantonggohon parambilan ase iparuhuri Tonduy na Pansing mamingkiri ambilan. Sonai sogod ni ari Minggu ai ase ibahen marhidorat hata-Ni ase ipasu-pasu ganup partumpuan ni Kristen.
Roh ma hita hu gareja songon na boritan roh hu rumah sakit, mangalop tambar. Tangi ma ham bani doktor parambilan ai atap aha naboritmu janah aha tambarni. Haporsayai ham ma ambilan ai. Jadi itopa parmingguon ai uhurmu marhitei hatani ampa Tonduyni. Humpul ma uhurmu ibagas gareja mangihutkon tonggo ampa hata ni doding.
Tonggo
Ham Tuhan Naibata, tarima kasih ma Bamu. ibere Ham parsaranan hannami.
Amen.
Doding
Haleluya No. 20: 2, 3. Haleluya Ari Minggu >>
2. Na marsaran do tonduyhu bani ari Minggu in.
Ganup pusok ni uhurhu huogapkon do ijin.
Das hubagas uhur ni Jesus Kristus Tuhankin.3. Parhorjaan ari-ari hutadingkon do ijin ,
Ase hupasari-sari goluh partonduyon in.
Arta siharganan in jumpah au bai Minggu in.
5 Februari: Malas ni uhur Ibagas Jahowa Ai Do Gogoh Nasiam >>
Recent Comments